ویب ڈیسک: پنشن اصلاحات پر مذاکرات ناکام ہونے کے بعد سرکاری ملازمین کا آج سے دفاتر بند کرنے کا اعلان، خیبر پختونخوا کے سرکاری ملازمین نے پنشن اصلاحات کیخلاف احتجاج کرتے پشاور میں احتجاجی دھرنا دے دیا جس کے باعث پشاور کے ٹریفک کا نظام ایک بار پھر درہم برہم ہوگیا۔
تفصیلات کے مطابق خیبر پختونخوا حکومت اور سرکاری ملازمین کے درمیان پنشن اصلاحات کے حوالہ سے مذاکرات ناکام ہوگئے ہیں جس کے بعد ملازمین کا آج سے دفاتر بند کرنے کا اعلان کیا گیا ہے، مظاہرین نے بتایا ہے کہ حکومت مطالبات ماننے کو تیار نہیں ، اور پنشن ہمارا حق ہے جسے چھیننے نہیں دینگے۔
ذرائع کے مطابق خیبر پختونخوا کے سرکاری ملازمین نے پنشن اصلاحات کیخلاف احتجاج کرتے ہوئے صوبائی اسمبلی کے سامنے دھرنا دیا، ملازمین نے صوبائی حکومت سے پنشن اصلاحات کے نام پر پنشن نظام میں تبدیلیوں کو واپس کرنے کا مطالبہ کیا۔ مظاہرین نے مطالبات نہ ماننے پر آج سے صوبے کے تمام سرکاری دفاتر، کالجز اور ہسپتال بند کرنے کا اعلان کردیا۔
احتجاجی شرکاءنے ملازمین کو ہدایت دی کہ وہ کمبل اور ضروری سامان لے کر پشاور پہنچیں اور صوبائی اسمبلی کے باہر احتجاجی دھرنا دیاجائیگا۔ اس وقت وہ حکمران ہیں جنہوں نے خود 126دن دھرنا دیا، تو کیا ہم نہیں کرسکتے؟ ہم ان سے 5گنا زیادہ ہیں، 2021ءمیں ان کے وزیر اعظم عمران خان سے حق لیا تھا تو یہ ان کے مقابلے میں کچھ بھی نہیں۔
سرکاری ملازمین ایسوسی ایشن نے الزام عائد کیا کہ پنشن اصلاحات کے نام پر سرکاری ملازمین سے ان کا حق چھینا جا رہا ہے، ملازمین کو ریٹائرمنٹ کے بعد صرف پنشن کا سہارا ہوتا ہے لیکن صوبائی حکومت اب وہ سہارا بھی چھیننا چاہتی ہے، جس نظام کے تحت اب تک تمام امور نمٹائے جا رہے تھے، حکومت اسی نظام کو فی الفور بحال کرے۔
دوسری جانب ملازمین کے احتجاج کی وجہ سے خیبر روڈ ہر قسم کی ٹریفک کیلئے بند ہوگیا جس پر ٹریفک وارڈنز پشاور نے متبادل ٹریفک پلان جاری کردیا۔ ریڈیو پر مسلسل 15منٹ بعد پشاورکی سڑکوں سے متعلق آگاہی فراہم کی جاتی رہی جبکہ سوشل میڈیا پر بھی تفصیلات جاری کی جارہی تھیں۔
ترجمان ٹریفک وارڈن کے مطابق دفتری عملہ بھی سڑک پر تعینات کردیا گیا، تاکہ ٹریفک کی روانی برقرار رکھی جا سکے ۔ حکومت اور سرکاری ملازمین کے درمیان احتجاج ختم کرنے کے کئی دور ہوئے تاہم احتجاج ختم کرنے سے متعلق کوئی پیش رفت نہ ہوسکی۔
صدر ملازمین ایسوسی ایشن کے مطابق حکومت کے ارادے کچھ اور ہیں، پنشن میں مزید کٹ لگانے کی باتیں ہورہی ہیں، مداکرات میں کوئی مثبت جواب نہیں ملا، اس لئے آج دوبارہ صبح 11 بجے احتجاج کرینگے، صدر اگیگا سمیع اللہ خلیل نے ہدایت کی کہ صوبہ بھر سے آئے سرکاری ملازمین پشاور میں ہی موجود رہیں اور جمعرات کی صبح دوبارہ احتجاج کیلئے اکٹھے ہوں۔
