پشاور ڈی آئی خان موٹر وے

پشاور ڈی آئی خان موٹر وے کیلئے زمین کی خریداری کا عمل شروع کرنے کا فیصلہ

ویب ڈیسک: خیبر پختونخوا حکومت نے پشاور ڈی آئی خان موٹر وے منصوبے پر عملدرآمد کے لئے زمین کی خریداری کا عمل شروع کرنے کا فیصلہ کیا ہے ۔
وزیراعلیٰ خیبر پختونخوا علی امین گنڈا پور کی زیر صدارت پشاور ڈی آئی خان موٹروے سے متعلق اہم اجلاس منعقد ہوا جس میں مشیر برائے خزانہ اور ایڈیشنل چیف سیکرٹری منصوبہ بندی کے علاہ محکمہ خزانہ، منصوبہ بندی اور مواصلات کے اعلیٰ حکام نے شرکت کی ۔
اجلاس میں مجوزہ فلیگ شپ منصوبے پر عملدرآمد کے سلسلے میں دستیاب مختلف آپشنز کا جائزہ لیتے ہوئے منصوبے پر عملدرآمد کے لیے زمین کی خریداری کا عمل شروع کرنے کا فیصلہ کیا گیا ۔
اس موقع پر محکمہ خزانہ کو زمین کی خریداری کے لیے ابتدائی طور پر دو ارب روپے کی رقم جاری کرنے کی ہدایت کی گئی جبکہ منصوبے کے لیے پشاور اور ڈی آئی خان دونوں اطراف سے بیک وقت زمین کی خریداری کا عمل شروع کرنے کا فیصلہ کیا گیا۔
اجلاس کے دوران وزیراعلیٰ کو مجوزہ فلیگ شپ کے مختلف پہلوں پر تفصیلی بریفنگ دیتے ہوئے بتایا کہ 365کلومیٹر طویل یہ موٹروے چھ لینز پر مشتمل ہوگاجس پر 19انٹرچینجز اور 2ٹنلز تعمیر کئے جائیں گے۔
بریفنگ کے دوران بتایا گیا کہ مجوزہ موٹروے سات اضلاع کو ایک دوسرے سے جوڑے گاجبکہ اس منصوبے کی تعمیر پر 348 ارب روپے کی تخمینہ لاگت آئے گی۔
اجلاس کے دوران گفتگو کرتے ہوئے وزیراعلیٰ علی امین گنڈا پور نے کہا کہ پشاور ڈی آئی خان موٹروے صوبائی حکومت کا فلیگ شپ منصوبہ ہے جوکہ صوبے کی معاشی ترقی میں ایک سنگ میل ثابت ہوگا۔
انہوں نے کہا کہ موٹروے کی تعمیر سے صوبے میں معاشی اور کاروباری سرگرمیوں کو فروغ ملے گا، منصوبے کی تکمیل سے نہ صرف لوگوں کو ٹرانسپورٹ کی معیاری سہولیات فراہم ہونگی بلکہ روزگار کے مواقع بھی فراہم ہونگے۔
وزیراعلیٰ نے ہدایات دیں کہ مجوزہ موٹروے کی تعمیر کے لئے متعلقہ محکمے مل بیٹھ کر قابل عمل تجاویز حتمی منظوری کے لئے پیش کریں۔

مزید پڑھیں:  اسلام آباد ہائیکورٹ: امریکی وکیل نے ڈاکٹر عافیہ کی وطن واپسی کا طریقہ بتادیا