ویب ڈیسک: کوئٹہ میں قدیم قرآنی نسخے اور اوراق چوری کر لئے گئے، اس کیلئے حفاظتی شیشے تک توڑ دیئے گئے ہیں۔
تفصیلات کے مطابق کوئٹہ شہر کے مغرب میں کوہ چلتن میں واقع جبل نور القرآن میں رکھے گئے قدیم قرآنی نسخے اور اوراق چوری کر لئے گئے ہیں۔
انچارج جبل نور القرآن اجمل خان کا اس حوالے سے کہنا ہے کہ قدیم نسخے سرنگ کے اندر شیشوں میں ڈسپلے کئے ہوئے تھے، تقریباً 150 قرآنی نسخے اور قدیم اوراق کو شیشے توڑ کر نکالا گیا ہے۔ جبل نور القرآن میں قرآنی نسخے چوری کرنے کا مقدمہ بروری تھانے میں نامعلوم چوروں کے خلاف درج کر لیا گیا ہے، تاہم کوئی گرفتاری عمل میں نہیں لائی جا سکی ہے۔
یاد رہے کوئٹہ شہر میں جبل نور القرآن1992 میں تعمیر کیا گیا تھا، یہاں پہاڑ کو تراش کر سرنگ بنائے گئے ، ان سرنگوں میں قرآن پاک کے قدیم نسخوں اور شہید اوراق کو محفوظ کیا جاتا ہے، جبل نور القرآن میں اس وقت لاکھوں کی تعداد میں قرآن پاک کے اوراق موجود ہیں۔
