ویب ڈیسک: ہیلتھ انشورنس سکیم کی کامیابی کے بعد خیبر پختونخوا حکومت کا سماجی تحفظ کے لئے ایک اور انقلابی اقدام، وزیر اعلی خیبرپختونخوا علی امین گنڈاپور کی جانب سے صحت کارڈ سکیم میں لائف انشورنس سکیم بھی شامل کرنے کا فیصلہ کر لیا گیا ہے۔
لائف انشورنس سکیم پر عملدرآمد کے لئے مفاہمت کی یادداشت پر دستخط کر دیئے گئے ہیں، اس سلسلے میں ایک تقریب وزیر اعلی ہاوس میں منعقد ہوئی، جس کے مہمان خصوصی وزیراعلی سردار علی امین گنڈاپور تھے۔ تقریب میں صحت کارڈ سکیم اور سٹیٹ لائف انشورنس کے حکام نے ایم او یو سائن کی۔
تقریب میں خطاب کرتے ہوئے وزیراعلیٰ خیبرپختونخوا علی امین گنڈاپور نے کہا کہ خیبر پختونخوا حکومت انشورنس سکیم شروع کرنے والا ملک کا پہلا صوبہ بن گیا ہے، جو کہ صوبائی حکومت اور صوبے کے عوام کے لئے فخر اور خوشی کی بات ہے، صوبائی حکومت کی یہ اسکیم نہ صرف ملک بلکہ پوری دنیا میں اپنی نوعیت کا منفرد اور پہلی فلاحی سکیم ہے۔
انہوں نے کہا کہ خیبر پختونخوا حکومت بانی پی ٹی آئی کے وژن کے مطابق فلاحی ریاست کے قیام کے لئے عملی اقدامات کر رہی ہے، سکیم کے تحت صحت انصاف کارڈ سکیم کے تحت زیر علاج خاندان کے سربراہ کی فوتگی کی صورت میں ورثاء کی مالی معاونت کی جائے گی، 60 سال تک کی عمر کے خاندان سربراہ کی فوتگی پر ورثاء کو 10 لاکھ روپے دئیے جائیں گے۔
وزیر اعلی خیبرپختونخوا نے خطاب کرتے ہوئے مزید کہا کہ 60 سال سے زائد عمر کے خاندان سربراہ کی فوتگی پر خاندان کو پانج لاکھ روپے دئیے جائیں گے، لائف انشورنس سکیم کے تحت ایک کروڑ چار لاکھ سے زائد خاندان مستفید ہونگے، اس سکیم پر سالانہ ساڑھے چار ارب روپے لاگت آئے گی، جو صوبائی حکومت برداشت کرے گی۔
علی امین گنڈاپور نے بتایا کہ صحت کارڈ پلس کے بعد لائف انشورنس سکیم سماجی تحفظ کے سلسلے میں صوبائی حکومت کا دوسرا بڑا پروگرام ہے، صوبے کے 49 فیصد خاندان غربت کی لکیر سے نیچے رہ رہے ہیں، ان کے سماجی تحفظ کو یقینی بنانے کے لئے پرعزم ہیں، معاشرے کے کمزور طبقوں کی کفالت بانی چئیرمین کے وژن کا اہم جز اور ریاست کی ذمہ داری ہے۔
ان کا کہنا تھا کہ موجودہ صوبائی حکومت اس سلسلے میں متعدد پروگراموں پر عملدرآمد کر رہی ہے، لائف انشورنس سکیم خاندان کی کفالت کرنے والے کی رحلت کی صورت میں متاثرہ خاندانوں کو ریلیف کی فراہمی میں اہم کردار ادا کرے گی، صحت کارڈ سکیم کے تحت صوبے کی سو فیصد آبادی کو علاج معالجے کی مفت اور معیاری سہولیات فراہم کی جارہی ہے۔
