ویب ڈیسک: وزیراعلیٰ خیبر پختونخوا سردار علی امین گنڈاپور نے کہا ہے کہ معیشت کے استحکام اور روزگار کے مواقع پیدا کرنے میں صنعتوں کا کلیدی کردار ہے، خیبر پختونخوا حکومت شعبہ صنعت و تجارت کو ترقی دینے اور درپیش مسائل کے حل کے لیے ایک جامع حکمت عملی کے تحت کام کر رہی ہے۔
وزیراعلیٰ خیبرپختونخوا علی امین گنڈاپور سے فیڈریشن آف پاکستان چیمبرز آف کامرس اینڈ انڈسٹری کے وفد نے ملاقات کی، اس دوران وزیراعلیٰ کے معاون خصوصی برائے صنعت عبد الکریم، سیکرٹری صنعت اور دیگر متعلقہ حکام بھی موجود تھے۔
اس موقع پر خیبرپختونخوا میں صنعتی و تجارتی سرگرمیوں کے فروع اور صنعت و تجارت کے شعبے کو درپیش مسائل کے حل، اور نجی سرمایہ کاری کے فروغ کے لئے صوبائی حکومت کے اقدامات پر بھی گفتگو کی گئی۔ اس دوران وزیر اعلیٰ کی جانب سے تجارتی و صنعتی شعبے کی بہتری کے لیے متعلقہ محکموں اور چیمبرز آف کامرس اینڈ انڈسٹریز کے درمیان قریبی روابط اور پالیسی سازی میں باہمی مشاورت کی ضرورت پر زور دیا گیا۔
وزیراعلیٰ سردار علی امین گنڈاپور نے اس موقع پر کہا کہ خیبر پختونخوا حکومت شعبہ صنعت و تجارت کو ترقی دینے اور درپیش مسائل کے حل کے لیے ایک جامع حکمت عملی کے تحت کام کر رہی ہے، ہم ایک ایسا ٹھوس اور جامع نظام چاہتے ہیں جس میں تمام مسائل کا کل وقتی حل موجود ہو۔
وزیر اعلیٰ خیبرپختونخوا نے کہا کہ ایز آف ڈوئنگ بزنس ایکٹ حتمی مراحل میں ہے جس میں ون ونڈو آپریشن کے تحت صنعت کاروں، تاجروں اور سرمایہ کاروں کو تمام سہولیات دستیاب ہونگی، اس مقصد کے لئے انڈسٹریل پالیسی 2025 پر بھی کام جاری ہے، اس حوالے سے چیمبر آف کامرس سے منسلک ماہرین اپنی تجاویز دیں تاکہ ایک مضبوط اور قابل عمل نظام وضع کیا جا سکے۔
انہوں نے کہا کہ معیشت کے استحکام اور روزگار کے مواقع پیدا کرنے میں صنعتوں کا کلیدی کردار ہے، جس سے قطعی انکار نہیں کیا جا سکتا، جبکہ دوسری طرف صوبے میں نجی سرمایہ کاری کے بے پناہ مواقع موجود ہیں، اس لئے صوبائی حکومت صوبے میں سرمایہ کاری کے لئے نجی سرمایہ کاروں کی نہ صرف حوصلہ افزائی کرے گی بلکہ انہیں تمام سہولیات بھی فراہم کرے گی۔
علی امین گنڈاپور کا کہنا تھا کہ صوبائی حکومت اپنی بجلی کی پیداوار کو رعایتی نرخوں پر مقامی صنعتوں کو فراہم کرنے پر کام کر رہی ہے، صنعت و تجارت اور سرمایہ کاری سے متعلق صوبائی حکومت کے بورڈز میں چیمبر آف کامرس اینڈ انڈسٹریز کے نمائندے شامل کئے جائیں گے، ہماری کوشش ہے کہ ہم بہتر نتائج اور پائیدار ترقی کے لئے نجی سیکٹر کے ماہرین کے ساتھ مل کر آگے بڑھیں۔
وزیر اعلیٰ نے اس ملاقات کے دوران مزید کہا کہ صوبائی حکومت صنعتکاروں کو درپیش مسائل ترجیحی بنیادوں پر حل کرنے کے لیے پرعزم ہے، ہم نے اپنے دائرہ اختیار میں موجود ٹیکسز کے سلسلے میں ہر ممکن ریلیف دیا ہے، ہمارا حتمی مقصد صوبے میں کاروباری سرگرمیوں کو فروغ دینا اور مقامی معیشت کو مستحکم بنانا ہے۔
ان کا کہنا تھا کہ صوبائی حکومت نے کاروبار کے فروغ کے لیے بلاسود قرضوں کے مختلف پروگرامز شروع کر رکھے ہیں، ہم نے فنی تعلیم میں ڈگری ہولڈرز کو بلاسود قرض کی فراہمی کے پروگرام کا بھی اجراء کیا ہے، ہوم سٹے ٹورازم پراجیکٹ کے اجراء کے لیے بھی مفاہمتی یاداشت پر دستخط ہو چکے ہیں، جو کہ صوبائی حکومت کا منفرد اقدام ہے، جس سے سیاحت اور روزگار دونوں کو فروغ ملے گا۔
علی امین گنڈاپور کا کہنا تھا کہ صحت عامہ کے تحفظ کے لئے اشیاء خوردونوش کے معیار کو یقینی بنانے کے لئے اقدامات کر رہے ہیں، صنعتوں کے مالکان وسیع تر عوامی مفاد کے پیش نظر اس سلسلے میں حکومت سے تعاون کریں۔
انہوں نے ملاقات کے دوران بتایا کہ عوام کی صحت ہم سب کی ترجیح ہونی چاہیے، ضرورت پڑی تو ملاوٹ شدہ اشیاء تیار اور فروخت کرنے والوں کے خلاف مہم بھی چلائیں گے۔
ان کا کہنا تھا کہ قومیں اخلاقیات پر کھڑی ہوتی ہیں، ہمیں بھی بطور قوم اپنا اخلاقی معیار بہتر بنانا ہو گا، جب تک ہم غلط کو غلط اور صحیح کو صحیح نہیں کہیں گے، حالات نہیں بدلیں گے، حکومت اپنی سطح پر کام کر رہی ہے مگر معاشرے کی مجموعی سوچ کو بدلنے کی ضرورت ہے۔
علی امین گنڈاپور نے ملاقات کے دوران کہا کہ جب ہم ایک ٹیم کے طور پر چلیں گے تو اس کے نتائج بہت بہتر ہوں گے، اس موقع پر وفد نے صنعتی و تجارتی سرگرمیوں کے فروغ کے لئے صوبائی حکومت کے اقدامات کی تعریف کی، اور انہوں نے صنعت کاروں اور تاجروں کے مسائل کے حل میں دلچسپی لینے پر وزیر اعلی کا شکریہ ادا کیا۔
