ویب ڈیسک: وزیر اعلیٰ خیبر پختونخوا علی امین گنڈاپور نے مطالبہ کیا ہے کہ ضم اضلاع بارے تشکیل کردہ وفاقی کمیٹی کا نوٹس واپس لیا جائے، وفاقی حکومت کی جانب سے جاری متنازعہ کمیٹی کو نوٹیفکیشن صوبائی حقوق کی نفی اور آئین کے خلاف ہے۔ اس حوالے سے وزیر اعلیٰ خیبر پختونخوا علی امین گنڈاپور نے وزیر اعظم شہباز شریف کو خط لکھ دیا۔
وزیراعظم کو بھیجے گئے خط میں علی امین گنڈاپور نے مطالبہ کیا ہے کہ ضم اضلاع بارے تشکیل کردہ وفاقی کمیٹی کا نوٹس واپس لیا جائے، وفاقی حکومت کی کمیٹی پر تحفظات ہمارے تحفظات ہیں۔
انہوں نے کہا کہ 25ویں آئینی ترمیم کے تحت فاٹا خیبرپختونخوا میں ضم ہوا، اور آئین کے مطابق ضم شدہ اضلاع کے حوالے سے تمام انتظامی اختیارات خیبر پختونخوا حکومت کے پاس ہیں، اس حوالے سے کمیٹی کے قیام کا نوٹیفکیشن آئین کی خلاف ورزی اور صوبائی حکومت کے اختیارات کی منافی ہے۔ وزیر اعلیٰ خیبر پختونخوا کا خط میں مزید کہنا ہے کہ اپنے آئینی حقوق کے لیے صوبائی حکومت اعلیٰ عدلیہ سے بھی رجوع کر سکتی ہے۔
