رائد السعدی بھی رہا

36سال کے طویل ترین عرصے سے قید فلسطینی رائد السعدی بھی رہا

ویب ڈیسک: 4خواتین اسرائیلی فوجیوں کے رہائی کے بدلے رہا ہونے والوں میں 36سال سے اسرائیلی قید میں موجود رائد السعدی شامل ہیں ۔
میڈیا رپورٹس کے مطابق فلسطینی مزاحمتی تنظیم حماس نے جنگ بندی معاہدے کے تحت 4خواتین اسرائیلی فوجیوں کو رہا کیا جن کے بدلے اسرائیل نے مزید 200 فلسطینی قیدی رہا کردیے۔
اسرائیلی قید سے رہا ہونے والوں میں رائد السعدی بھی شامل ہیں جو 36 سال سے اسرائیلی قید میں تھے۔
رائد السعدی 3 جنوری 1963 کو جنین کے قصبے السِیلہ الحارثیہ میں پیدا ہوئے۔ رائد السعدی بچپن سے ہی اسرائیلی قبضے کے خلاف مزاحمت کیلئے مشہور تھے اور انہیں 17 سال کی عمر میں 6 ماہ تک گرفتار کیا گیا تھا کیونکہ انہوں نے اپنے قصبے میں بجلی کے کھمبوں پر فلسطینی پرچم لہرایا تھا۔
وہ اگست 1989 سے گرفتار ہیں اور اسرائیلی عدالتوں نے انہیں اسلامی تحریک جہاد کے عسکری ونگ القدس بریگیڈز سے تعلق رکھنے اور فوجی کارروائی کرنے کے الزام میں دو بار عمر قید کے ساتھ ساتھ مزید 20 سال قید کی سزا سنائی تھی۔
رائد السعدی نے دوران اسیری اپنے خاندان کے کئی افراد کو کھویا، ان کی والدہ بھی 2014 میں انتقال کر گئی تھیں جبکہ والد بینائی سے محروم ہو گئے تھے۔

مزید پڑھیں:  خیبرپختونخوا: سکیورٹی فورسز کے 2 آپریشنز میں‌ 7 دہشتگرد ہلاک