ویب ڈیسک: مزاحمتی تنظیم حماس کے شہید سربراہ یحییٰ السنوار کی غزہ میں جنگ کے دوران مسلح گھومنے کی نئی ویڈیو سامنے آگئی ہے ۔
الجزیرہ ٹیلی ویژن نے فلسطینی مزاحمتی تنظیموں کی جانب سے 7 اکتوبر 2023 کے طوفان الاقصی آپریشن پر ایک ڈاکیومنٹری جاری کی جس میں جنگجوئوں کی جانب سے غزہ جنگ کی منصوبہ بندی دکھائی گئی ہے۔
ڈاکیومنٹری میں حماس کے شہید سربراہ یحیی السنوار کو بھی دکھایا گیا ہے اور ان کی اسرائیل کے خلاف مزاحمتی مصروفیات دکھائی گئیں، شہید یحییٰ السنوار عام مجاہدین کی طرح کلاشنکوف لیے اور میگزین بیلٹ باندھے گھوم رہے ہیں۔
ڈاکیومنٹری میں القسام بریگیڈز کی اعلیٰ قیادت کو بھی دکھایا گیا لیکن ان کے چہرے چھپائے گئے ہیں تاہم شہید ہونے والے افراد کو بھی دکھایا گیا۔
اس کے علاوہ انہیں میدان جنگ میں اسرائیلی ٹینکوں کا قریب سے معائنہ کرتے بھی دیکھا جاسکتا ہے، ویڈیو میں یحیی السنوار اسرائیلی بمباری سے تباہ گھر میں بیٹھ کر شہید کمانڈر کے ساتھ جنگی منصوبہ بندی میں مصروف ہیں۔
اس دستاویزی فلم میں یحیی السنوار یہ شعر پڑھتے ہوئے بھی نظر آئے کہ آزادی کا دروازہ سرخ ہے جس پر خون سے ڈوبا ہاتھ دستک دیتا ہے۔
