حکومت کمیشن کا اعلان کرے

حکومت کمیشن کا اعلان کرے پھر دیکھیں گے، پی ٹی آئی

ویب ڈیسک: چیئرمین تحریک انصاف بیرسٹر گوہر علی خان نے کہا ہے کہ مذاکرات کے آغاز میں حکومت نے تاخیر کی، حکومت چاہے تو کمیشن کا اعلان کر دے، اس کے بعد ہم دیکھیں گے
نجی ٹی وی سے گفتگو کرتے ہوئے چیئرمین پی ٹی آئی بیرسٹر گوہر کا کہنا تھا کہ حکومت کے ساتھ مذاکرات کے حوالے سے جو پاکستان تحریک انصاف کے بانی عمران خان نے کہا وہی پارٹی کا فیصلہ ہے۔
انہوں نے کہا کہ مذاکرات کے آغاز میں حکومت نے تاخیر کی،کمیشن کی تشکیل میں بھی تاخیر کی، اب بھی حکومت سنجیدہ ہے تو ایک بھی مثبت قدم اٹھائے، ہم عمران خان سے بات کریں گے ۔
بیرسٹر گوہر نے مزید کہا کہ 7دن ختم ہونے کے بعد مذاکراتی عمل باضابطہ ختم ہو چکا ہے، حکومت چاہے تو کمیشن کا اعلان کر دے، اس کے بعد ہم دیکھیں گے، حکومت کمیشن کے ٹی او آرز پر بیٹھنے کا کہے تو اس پر بانی سے بات کریں گے۔
دوسری جانب حکومتی کمیٹی کے ترجمان عرفان صدیقی نے کہا کہ پی ٹی آئی نے یکطرفہ طور پر اچانک مذاکرات ختم کیے، یہ کمیٹی ہی نہیں خود پی ٹی آئی کے لیے حیران کن تھا، اڈیالہ جیل سے بیرسٹر گوہر نے مذاکرات ختم کرنیکا اعلان کیا۔
سینیٹر عرفان صدیقی کا کہنا تھا بیرسٹر گوہر نے کہا عمران خان نے دو ٹوک الفاظ میں کہا ہے مذاکرات کی گنجائش ختم، شام کو یہ جواز پیش کیا کہ صاحبزادہ حامد رضا کے گھر پر پولیس گرفتاری کے لئے گئی، صاحبزادہ حامد رضا نے مذاکرات پر "ایبسولیٹلی ناٹ” کے الفاظ استعمال کیے۔
ان کا کہنا تھا طے شدہ اعلامیے کے مطابق7 دن سے قبل نہ کوئی جواب دیں گے نہ کمیشن پر اعلان کریں گے، ہم تماشہ بننے کو تیار نہیں، 28تاریخ کو اجلاس کیلئے تیار بیٹھے ہیں۔
عرفان صدیقی کا کہنا ہے کمیشن کا جواب مذاکراتی نشست میں دینا ہے، وہیں دیں گے، ہم دھمکی کا یا بائیکاٹ کا ایسے جواب نہیں دیں گے۔

مزید پڑھیں:  پیکا ایکٹ پھیکا ایکٹ ہے،ہم صحافیوں کیساتھ چلیں گے، فضل الرحمان