ویب ڈیسک: کراچی میں باچا خان اور ولی خان کی برسی کی مناسبت سے منعقدہ تقریب سے خطاب کرتے ہوئے اے این پی کے مرکزی صدر ایمل ولی خان نے کہا کہ ریاست پختونوں کیساتھ ناروا سلوک نہ رکھے، پورا ملک بند کرسکتے ہیں، کیونکہ ملک کی چابی پختونوں کے ہاتھ میں ہے۔
کراچی میں مزار قائد کے سامنے باغ جناح میں باچا خان اور عبدالولی خان کی برسی کی مناسبت سے جلسے کے موقع پر انہوں نے کہا کہ کراچی سب کا شہر ہے، آصف زرداری اور بلاول سے گذارش ہے کہ کراچی کے پختونوں پر شفقت کا ہاتھ رکھیں۔
یاد رہے جلسہ میں شرکت کیلئے اے این پی کے کارکنان ریلیوں کی شکل میں جلسہ گاہ پہنچے جبکہ جلسے میں خواتین سمیت کارکنوں کی بڑی تعداد شریک ہوئی۔
ایمل ولی خان کا کہناتھاکہ آج ہم باچا خان اور ولی خان جیسی قیادت کی یاد میں جمع ہوئے ہیں، باچا خان اور خدائی خدمت گاروں نے انگریز سامراج کے سامنے آواز اٹھائی، باچا خان نے عدم تشدد کا فلسفہ دیا جس پر ہم آج بھی کاربند ہیں، ولی خان کی تاریخ آزاد ہے،اس پر لوگ پی ایچ ڈی کرتے ہیں۔
ایمل ولی کا کہنا تھا کہ آج تک ہر انتخابات میں دھاندلی ہوئی، ملک میں حکومت بھی کمپرومائزڈ ہے اور اپوزیشن بھی، آج پاکستان میں جمہوریت نام کی کوئی چیز نہیں، خیبرپختونخوا میں 90 فیصد مینڈیٹ دے کر قومی اسمبلی میں کمپرومائزڈ اپوزیشن بنائی گئی۔
انہوں نے کہا کہ 1985 میں بدترین انتخابات ہوئے، 2013 میں جہاں سب انتخاب لڑ رہے تھے ہم لاشیں اٹھا رہے تھے، اس بار عوام کے مینڈیٹ کو بیچ کر لوگوں کو لاکر اسمبلی میں بیٹھا دیا گیا، حکومت سے توقع نہیں ہے کہ وہ آزاد ہو گی کیونکہ ان کو حکومت ملی ہے، مینڈیٹ ان کا نہیں، خیبر پختونخوا کا 90 فیصد مینڈیٹ غیر ذمہ دارانہ لوگوں کو دیا گیا۔
اے این پی سربراہ نے کہا کہ کراچی سب کا شہر ہے، اگر قوم کہے کہ اس پر میرا حق ہے اور کسی کا نہیں تو یہ غلط ہے، اگر پختونوں کے ساتھ سلوک ٹھیک نہیں رکھیں گے تو کراچی بھی نہیں چل پائے گا۔ ریاست پختونوں کے ساتھ ناروا سلوک نہ رکھے، پورا پاکستان بند کرسکتے ہیں، کیونکہ چابی میرے ورکر کے ہاتھ میں ہے۔
