ویب ڈیسک: پاکستان کیلئے امریکی امداد بند، کئی اہم منصوبے رک گئِے۔ زراعت کے شعبے میں 5 اہم پروگرام بھی متاثر۔
تفصیلات کے مطابق پاکستان اور امریکا کے تعلقات میں نیا موڑ آگیا، حکام نے پاکستان کیلئے امریکی امداد بند ہونے کی تصدیق کردی، جس کے باعث کئی اہم منصوبے روک دیے گئے۔ اس حوالے سے امریکی حکام کا کہنا ہے کہ ازسر نو جائزے تک پاکستان کیلئِے امریکی امداد بند رہے گی۔
گزشتہ روز امریکا نے تقریباً تمام غیر ملکی امدادی پروگرام عارضی طور پر معطل کر دیئے تھے، جن میں یوکرین، تائیوان اور اردن کی امداد کا پروگرام بھی شامل ہے، جبکہ یہ امدادی پروگرام ابتدائی طورپر 90 روز کیلئے معطل کیے گئے ہیں۔
امریکی اقدام سے پاکستان کے توانائی سیکٹر میں 5 منصوبوں پر کام رک گیا، اقتصادی نمو سے متعلق 4 اور زراعت کے شعبے میں 5 پروگرامز بھی متاثر ہوئے، جبکہ جمہوریت، انسانی حقوق اور گورننس سے متعلق فنڈز بھی عارضی طور پر روک دیئے گئے ہیں۔ امریکی اقدام سے گورننس کے 11، تعلیم کے 4 اور صحت کے شعبے میں بھی 4 پروگراموں پر اثر پڑا۔
امریکا کے تمام سفارتی اور قونصل مشنز کو محکمہ خارجہ کی جانب سے حکم نامہ جاری کیا گیا تھا جس میں کہا گیا کہ تمام امدادی پروگرام فوری طور پر معطل اور اس ضمن میں کئَ جانے والے تمام کام فوری بند کر دیے جائیں، تاہم اب امریکی حکام نے دوسرے ممالک کی طرح پاکستان کیلئے بھی امریکی امداد بند ہونے کی تصدیق کردی ہے۔
امریکی عہدیدار کے مطابق ازسرنو جائزے تک پاکستان کی امداد روک دی گئی ہے۔ یاد رہے ٹرمپ انتظامیہ کی جانب سے امدادی پروگرامز ابتدائی طور پر 90 روز کیلئے معطل کئے گئے ہیں۔ اس حوالے سے یہ بھی بتایا گیا ہے کہ امریکی حکام ازسرنو جائزے کے بعد پروگراموں کو جاری رکھنے کا فیصلہ کریں گے۔
