ویب ڈیسک: مولانا فضل الرحمان سے آج اسد قیصر کی ملاقات طے، ملاقات میں تحریک انصآف کا وفد بھِی موجود ہوگا، ملاقات کے دوران سیاسی و پارلیمانی امور اور تحریک تحفظ آئین پاکستان کےایجنڈے پر بات چیت کی جائے گی۔
تفصیلات کے مطابق جمعیت علماء اسلام (ف) کے سربراہ مولانا فضل الرحمان سے آج اسد قیصر کی ملاقات طے پا گئی ہے، اس ملاقات کے حوالے سے بتایا گیا ہے کہ قائد جمیعت سے ملاقات کرنے والے پی ٹی آئی وفد میں عمر ایوب اور صاحبزادہ حامد رضا سمیت دیگر رہنما بھی شامل ہوں گے۔
پی ٹی آئی کا وفد آج سربراہ جے یو آئی (ف) مولانا فضل الرحمان سے ملاقات کرے گا، اس موقع پر تحریک تحفظ آئین کے قائدین بھی شامل ہوں گے۔ ملاقات کے دوران سیاسی و پارلیمانی امور اور تحریک تحفظ آئین پاکستان کےایجنڈے پر بات چیت کی جائے گی، جبکہ جے یو آئی اور پی ٹی آئی کے مشترکہ نکات کو آگے بڑھانے پر بھی تبادلہ خیال کیا جائے گا۔
اس حوالے سے صاحبزادہ حامد رضا کا کہنا تھا کہ مولانا کو تحریک تحفظ آئین پاکستان میں شمولیت کی دعوت دیں گے۔ وفد کی ملاقات سے قبل پی ٹی آئی رہنما حسین یوسفزئی نے مولانا فضل الرحمان سے ملاقات کر کے بانی پی ٹی آئی عمران خان کا پیغام بھی پہنچا دیا۔
دوسری جانب پی ٹی آئی وفد تمام اپوزیشن جماعتوں کے ساتھ بھی رابطے کرے گا، آج ہونے والی ملاقات میں گرینڈ اپوزیشن الائنس سے متعلق امور پر تبادلہ خیال کا امکان ہے۔
