ویب ڈیسک: صحافیوں کو اعتماد میں لینے تک صدر نے پیکا ایکٹ پر دستخط روک دیے، مولانا فضل الرحمان نے پارلیمانی رپورٹرز کے تحفظات صدر مملکت تک پہنچا دیئے۔
پیکا ایکٹ کے خلاف پارلیمانی رپورٹر ایسوسی ایشن کے مطابق متنازع پیکا ترمیمی بل کے خلاف احتجاج رنگ لانے لگا، صحافیوں نے جے یو آئی کے سربراہ مولانا فضل الرحمان کے ذریعے صدر مملکت سے رابطہ کیا، اور مولانا فضل الرحمان نے پارلیمانی رپورٹرز کے تحفظات صدر مملکت تک پہنچا دیئے۔
ذرائع کا کہنا ہے کہ صدر مملکت آصف علی زرداری نے اس صورتحال میں مولانا فضل الرحمن کی درخواست پر بل کچھ وقت کے لیے روک لیا، صدر مملکت نے پی آر اے کی پیکا ترمیمی بل پر فوری دستخط نہ کرنے کی درخواست مان لی۔
ذرائع کے مطابق پیکا ایکٹ پر دستخط سے قبل وزیر داخلہ اور صحافتی تنظیموں کی ملاقات پر غور جاری ہے، وزیر داخلہ محسن نقوی اور پارلیمانی رپورٹرز کے درمیان جلد ملاقات متوقع ہے۔ یاد رہے پی آر اے وفد نے کل جے یو آئی ف کے سربراہ مولانا فضل الرحمان سے پیکا ایکٹ پر صدر مملکت سے بات کی درخواست کی تھی جسے صدر مملکت نے تسلیم کرتے ہوئے پیکا ایکٹ پر فوری دستخط روک لئے۔
