ویب ڈیسک: وزیر اعلیٰ خیبرپختونخوا علی امین گنڈاپور نے ڈپٹی کمشنر پشاور کادورہ کرکے محافظ خانہ میں نئے قائم کیے گئے سروس ڈیلیوری سنٹر-II کا افتتاح کر دیا۔
اس موقع پر وزیراعلیٰ کو بریفنگ دیتے ہوئے بتایا گیا کہ نئے سروس ڈیلیوری سنٹر کے قیام سے سروس کائونٹرز کی تعداد 5 سے بڑھ کر 10تک پہنچ گئی جبکہ سیٹوں کی تعداد بھی 20 سے بڑھا کر 60 کر دی گئی۔
وزیراعلیٰ علی امین گنڈا پور کو آگاہ کیا کہ شہریوں کے لیے آرام دہ انتظار گاہ بھی موجود ہے،سروس ڈیلیوری کی موثر مانیٹرنگ کے لیے جدید کیمرے نصب کیے گئے ہیں۔
بریفنگ کے دوان بتایا گیا کہ ڈپٹی کمشنر اور دیگر متعلقہ حکام کی کیمرہ سسٹم تک براہ راست رسائی یقینی بنائی گئی ہے،علاوہ ازیںسنٹر میں ایک مخصوص کورٹ روم بھی قائم کیا گیا ہے۔
اس موقع پر وزیراعلیٰ علی امین گنڈا پور نے بات کرتے ہوئے کہا کہ سنٹر میں اضافی سہولیات کی فراہمی سے شہریوں کو مزید بہتر انداز میں خدمات کی فراہمی ممکن ہو گی۔
انہوں نے کہا کہ خواتین اور بزرگ شہریوں کے لیے مخصوص کانٹرز کا انتظام بہترین اقدام ہے ، سنٹر میں مخصوص انفارمیشن ڈیسک بنایا گیا ہے جس سے شہریوں کو معلومات تک آسان رسائی میسر ہو گی۔
وزیراعلیٰ کا مزید کہنا تھا کہ جدید سرویلنس سسٹم سے خدمات فراہمی کے عمل میں شفافیت آئے گی۔
