ویب ڈیسک: نیشنل ڈیفنس یونیورسٹی اسلام آباد میں پاکستان کاانسداد دہشتگردی میں کردارکے حوالے سے بین الاقوامی سیمینارکا انعقادکیا گیا۔
نیشنل ڈیفینس یونیورسٹی میں منعقدہ سیمینارکا عنوان پاکستان کا انسداد دہشت گردی میں کردار: امن و استحکام کا فروغ تھا، تقریب میں وفاقی وزیر دفاع خواجہ آصف اورسفیرمحمد صادق نے بھی شرکت کی۔
سیمینارمیں افغانستان کے ڈاکٹرحضرت عمرزاخیلوال، ایران کے پروفیسر ڈاکٹرسید محمد مرندی، امریکہ کے سفیراین ووڈزپیٹرسن اورپاکستان کے سفیرسید ابرارحسین شریک تھے۔
سیمینار میں حکومت کے اعلی حکام، سکیورٹی تجزیہ کاروں، سفارتکاروں، اسکالرز، صحافیوں اوریونیورسٹی کے طلبہ کے علاوہ مختلف شعبہ ہائے زندگی سے تعلق رکھنے والیافراد کی بھی بڑی تعداد نے شرکت کی۔
سیمینارمیں اس امر پراتفاق کیا گیا کہ گزشتہ دو دہائیوں کے دوران پاکستان عالمی جنگ برائے انسداد دہشت گردی میں صف اول میں رہا ہے اور علاقائی و عالمی امن کے لیے بے شمار قربانیاں دیں۔
دہشت گردی کے نیٹ ورکس کے خاتمے سے لے کر آپریشن ضربِ عضب اور رد الفساد جیسے وسیع پیمانے پر فوجی آپریشنز تک، پاکستان کی مسلح افواج، انٹیلی جنس ایجنسیاں، قانون نافذ کرنے والے ادارے اور پوری قوم نے غیرمعمولی عزم و ہمت کا مظاہرہ کیا ہے۔
ان کوششوں کے نتیجے میں شمالی وزیرستان اورسوات جیسے حساس علاقوں میں امن بحال ہوا اورملک بھر میں دہشت گردی کے واقعات میں نمایاں کمی آئی۔
2021 میں افغانستان سے امریکہ کے اچانک انخلا کے باعث پاکستان میں عسکریت پسندی کی سرگرمیاں دوبارہ بڑھنے لگی ہیں۔
سیمینارکے اختتام پر پاکستان، افغانستان، ایران اوردیگرعلاقائی ممالک کے درمیان انسداد دہشت گردی کے لیے مزید گہرے تعاون اور خطے میں سیکیورٹی فریم ورک کو مضبوط بنانے پر زوردیا گیا۔
