ویب ڈیسک: وفاقی حکومت کی جانب سے پاس کیا جانے والا پیکا ترمیمی ایکٹ 2025نافذ العمل ہو گیا جس کا گزٹ نوٹیفکیشن بھی جاری کر دیا گیا۔
وزارت قانون کی جانب سے باقاعدہ نوٹیفکیشن جاری ہونے کے بعد ملک بھر میں پیکا قانون کا باضابطہ اطلاق ہو گیا ، اس کے علاوہ ڈیجیٹل نیشن بل کا نوٹیفکیشن بھی جاری کر دیا گیا۔
یاد رہے کہ گزشتہ روز صدر مملکت آصف علی زرداری نے پیکا ترمیمی بل اور ڈیجیٹل نیشن بل 2025 پر دستخط کردیئے تھے جس کے بعد دونوں بل قانون بن گئے تھے۔
خیال رہے کہ ترمیمی بل کو پہلے قومی اسمبلی اور اس کے بعد سینٹ سے منظور کیا گیا تھا جس کے بعد بل صدر مملکت کے دستخط کے لئے ایوان صدر بھیجا گیا تھا۔
دوسری جانب سے ملک بھر کی صحافتی تنظیموں نے پیکا ایکٹ کے خلاف کل جمعہ کو ملک گیر یوم سیاہ منانے کا اعلان کیا ہے ۔
