عوام اور میڈیا نمائندگان کیساتھ کھڑے

پیکا ایکٹ مسترد ، عوام اور میڈیا نمائندگان کیساتھ کھڑے ہیں، عمرایوب

ویب ڈیسک: پاکستان تحریک انصاف کے رہنما اور قومی اسمبلی میں قائد حزب اختلاف عمر ایوب نے کہا ہے کہ پیکا ایکٹ مسترد کرتے ہیں، عوام اور میڈیا نمائندگان کیساتھ کھڑے ہیں، صحافت پر قدغن لگانا کسی طور قبول نہیں۔
اپوزیشن لیڈر قومی اسمبلی نے سرگودھا میں عدالت پیشی کے موقع پر میڈیا سے گفتگو کرتے ہوئے کہا کہ پاکستان میں آزاد صحافت یا آزادی کی بات کرنے کا معاملہ ختم ہو چکا، اس نئے قانون کے بعد اب میڈیا نمائندگان کھل کر لکھ سکتے ہیں نہ ہی بات کر سکتے ہیں۔
ان کا کہنا تھا کہ حکومت کا منظاور کردہ پیکا ایکٹ مسترد کرتے ہیں، اس معاملے پر ہم عوام اور میڈیا نمائندگان کیساتھ کھڑے ہیں۔ موجودہ حکومت کی پالیسیوں کے باعث مہنگائی آج کہاں سے کہاں پہنچ گئی ہے، غریب آدمی دو وقت کی روٹی کو ترس رہا ہے۔
قائد حزب اختلاف قومی اسمبلی نے واضح کیا کہ تحریک انصاف کا امریکا میں اقتدار کی تبدیلی سے کوئی تعلق نہیں اور نہ ہی ان سے کوئی امید ہے، پیپلز پارٹی سندھ کے لوگوں کی لاشوں کا سودا کر کے پانی تقسیم کرنے پر راضی ہو جائے گی۔
عمر ایوب کا کہنا تھا کہ موجودہ سیاسی بحران کے ذمہ دار سکندر سلطان راجہ ہیں، ہم عدالتوں میں پیش ہو رہے ہیں لیکن ہمارا قصور کیا ہے؟ یہ ہمیں معلوم نہیں، پارلیمانی کمیٹی بنانے کے لیے میرے خط کا ابھی تک وزیراعظم کی طرف سے جواب نہیں دیا گیا، 8 فروری کو صوابی میں بھرپور جلسہ ہوگا۔

مزید پڑھیں:  شہباز دور میں زرمبادلہ ذخائر 11 اعشاریہ 37بلین ڈالرتک پہنچ گئے،رپورٹ