ویب ڈیسک: تعلیم کے فروغ کیلئے صوبائی حکومت کا ایک اور اقدام، ایجوکیشن فاونڈیشن کے تحت سکالرشپس کا اجراء کر دیا گیا۔ رواں مالی کے دوران 204 طلبہ کو سکالرشپس کی فراہمی پر 20 ملین روپے لاگت آئے گی۔
وزیر اعلیٰ خیبر پختونخوا علی امین گنڈاپور نے اعلیٰ تعلیمی اداروں میں پڑھنے والے طلبہ کے لیے ایجوکیشن فاؤنڈیشن کے تحت سکالرشپس کا اجراء کر دیا، ان سکالرشپس کے ذریعے صوبے سے تعلق رکھنے والے طلبہ ملک کے مختلف اعلیٰ تعلیمی اداروں میں مفت تعلیم حاصل کر سکیں گے۔
تعلیم کے فروغ کیلئے صوبائی حکومت کے اس پروگرام کے تحت 204 طلبہ کو سکالرشپس میرٹ اور عدم استطاعت کی بنیاد پر دی جائیں گی، جبکہ رواں مالی کے دوران 204 طلبہ کو سکالرشپس کی فراہمی پر 20 ملین روپے لاگت آئے گی۔ اس کے ساتھ ساتھ وزیراعلیٰ کی جانب سے صوبے کے پسماندہ اضلاع سے تعلق رکھنے والے طلبہ کے لیے خصوصی سکالرشپس کا بھی اعلان کیا گیا ہے۔
وزیراعلیٰ کی جانب سے صوبے کے پسماندہ اضلاع سے تعلق رکھنے والے طلبہ کے لیے خصوصی سکالرشپس کیلئے کے لیے 100 ملین روپے کی اضافی سیڈ منی فراہم کرے گی۔ اس سے سکالرشپس کی سیڈ منی 300 ملین روپے سے بڑھ کر 400 ملین روپے ہو جائے گی۔
یاد رہے کہ یہ اضافی 100 ملین روپے کی سیڈ منی صرف پسماندہ علاقوں سے تعلق رکھنے والے طلبہ کے سکالرشپس کے لئے مختص ہوگی۔
وزیر اعلیٰ خیبرپختونخوا سردار علی امین گنڈاپور نے کہا ہے کہ صوبے میں تعلیم کا فروغ موجودہ صوبائی حکومت کی ترجیحات میں سرفہرست ہے، اس مقصد کے لئے صوبائی حکومت خطیر وسائل خرچ کر رہی ہے۔
انہوں نے کہا کہ اسی مقسد کیلئے چیف منسٹر ایجوکیشن اینڈومنٹ فنڈ کی سیڈ منی کو 1 اعشاریہ 2 ارب روپے سے بڑھا کر 2 اعشاریہ 4 ارب روپے کر دیا ہے، جبکہ صوبے میں تعلیم کارڈ کے لیے 2 ارب روپے کا الگ سے فنڈ قائم کر دیا گیا ہے۔
علی امین گنڈاپور نے کہا کہ ہونہار اور مستحق طلبہ کی تعلیم کے لئے ترجیحی بنیادوں پر وسائل فراہم کئے جائیں گے، ہماری حکومت میں کوئی بھی بچہ عدم استطاعت کی وجہ سے تعلیم سے محروم نہیں رہے گا۔
