کرم گرینڈ جرگہ

کرم گرینڈ جرگہ کا امن معاہدے پر عمل درآمد کا اعلان

ویب ڈیسک: کرم گرینڈ جرگہ ختم ہوگیا ،جرگے میں امن معاہدہ پرمکمل عمل درآمد کا اعلان کردیا گیا۔
مشیر اطلاعات خیبر پختونخوا بیرسٹر محمدعلی سیف نے اس حوالے سے کہا ہے کہ گرینڈ جرگہ میں امن معاہدے پر عمل درآمد کے لیے دونوں فریقین کی کمیٹیاں بنانے کا فیصلہ کیا گیا۔
انہوں نے کہا کہ جرگہ کی اگلی بیٹھک کا اعلان مشاورت کے بعد ہوگا، کرم مسئلہ نفرت کا نتیجہ ہے، ہم نے اسلامی تعلیمات بھلا دی ہیں،ہم سب اپنا نقصان کر رہے ہیں،جرگہ تب کامیاب ہوگا جب ہم نفرتیں ختم کریں۔
مشیر اطلاعات کا کہنا تھا کہ ہم نے اپنی غلطیوں سے سبق سیکھنا ہے،انسان کا قتل ناقابل معافی ہے،ہم اپنے بچوں اورعورتوں کو قتل کرتے ہیں، باہر سے کوئی نہیں آسکتا، ہم سب ایک دوسرے کے دشمن بنے ہیں۔
بیرسٹر سیف کا کہنا تھا کہ سوشل میڈیا کا نفرت پھیلانے میں بڑا کردار ہے، کرم امن معاہدے پر پورے ملک نے سکھ کا سانس لیا، لیکن شرپسندوں کو امن منظور نہیں، شرپسندں کو سامنے لانا ہوگا، حکومت کرم میں مکمل امن چاہتی ہے۔
دوسری جانب چیف سیکرٹری خیبر پختونخوا نے کہا کہ حکومت اور عمائدین کرم دونوں کو کردار ادا کرنا چاہیے، امن ہر صورت قائم ہوگا، کرم کے لیے ریلیف پیکیج منظور کر رہے ہیں، شرپسند رکاوٹ ڈالیں تو قانون حرکت میں آئے گا۔
انہوں نے کہا کہ امن میں سب کا فائدہ ہے، دونوں فریقین امن کی بحالی میں حکومت کا ساتھ دیں، آپریشن کا آپشن موجود ہے،آپریشن سے سب متاثر ہوں گے، آج اسسٹنٹ کمشنر پر فارنگ کرانے والے امن دشمن ہیں، شرپسندوں کا تعلق جس فریق سے بھی ہو حوالے کرنا ہوگا۔
چیف سیکرٹری کا مزید کہنا تھا کہ امن معاہدہ پر دونوں فریقین نے دستخط کیے ہیں، پاسداری سب کی ذمہ داری ہے، حکومت اپنا کام خوش اسلوبی سے سرانجام دے رہی ہے۔

مزید پڑھیں:  گورنر خیبرپختونخوا کا سی ایم ایچ پشاور کادورہ ،ایڈیشنل اسسٹنٹ کمشنر کی عیادت کی