قلات میں دہشتگردوں سے جھڑپ

قلات میں دہشتگردوں سے جھڑپ، 18 اہلکار شہید، 12 دہشتگرد ہلاک

ویب ڈیسک: قلات میں دہشتگردوں سے جھڑپ کے دوران 18 اہلکار شہید ہو گئے جبکہ اس دوران 12 دہشتگرد بھی ہلاک کر دیئے گئے.
تفصیلات کے مطابق صوبہ بلوچستان کے ضلع قلات کے علاقے منگوچر میں دہشت گردوں نے روڈ بلاک کرنے کی کوشش کی، تاہم اس دوران سیکورٹی فورسز اور قانون نافذ کرنے والے اداروں نے بروقت کارروائی کرتے ہوئے دہشت گردوں کے مذموم عزائم ناکام بنا دیئے۔
مقامی آبادی کے تحفظ کو یقینی بناتے ہوئے فورسز کے بروقت اقدام کے دوران 12 دہشت گرد ہلاک کر دیئے گئے، جبکہ اس دوران ایف سی بلوچستان کے 18 اہلکار بہادری سے لڑتے ہوئے جام شہادت نوش کر گئے۔
پاک فوج کے شعبہ تعلقات عامہ آئی ایس پی آر کے مطابق دہشتگردوں کا مقصد معصوم شہریوں کو نشانہ بناتے ہوئے بلوچستان کے امن کو خراب کرنا تھا، دہشت گردوں کی اس بزدلانہ کارروائی کے پس پردہ دشمن قوتوں کا ہاتھ ہونے کا شبہ ظاہر کیا جا رہا ہے۔
آئی ایس پی آر کے مطابق آپریشن کے دوران ایف سی بلوچستان کے 18 جوانوں نے بہادری سے لڑتے ہوئے جام شہادت نوش کیا، اس دوران علاقے میں سینی ٹائزیشن آپریشنز بھی کیے جا رہے ہیں، اور اس گھناؤنے فعل میں ملوث افراد، سہولت کاروں اور حوصلہ افزائی کرنے والوں کو انصاف کے کٹہرے میں لایا جائے گا۔
پاک فوج کے ترجمان کا کہنا ہے کہ پاکستان کی سیکیورٹی فورسز بلوچستان میں امن، استحکام اور ترقی کو سبوتاژ کرنے کی کوششوں کو ناکام بنانے کے لیے پرعزم ہیں۔ ہمارے بہادر سپاہیوں کی قربانیاں ہمارے عزم کو مزید مضبوط کرتی ہیں. یاد رہے کہ قلات میں دہشتگردوں سے جھڑپ کے دوران 18 اہلکار بہادری سے لڑتے ہوئے شہید ہو گئے جبکہ اس دوران 12 دہشت گرد بھی مارے گئے.

مزید پڑھیں:  9 مئی کو حد کردی گئی، اب آپ کو بنیادی حقوق یاد آگئےم سپریم کورٹ