ویب ڈیسک: ڈی جی خان میں دہشتگردوں کا پولیس چیک پوسٹ پر حملہ ناکام، پولیس کی جانب سے دہشت گردوں کیخلاف علاقے میں سرچ آپریشن جاری ہے۔
تفصیلات کے مطابق ڈیرہ غازی خان میں دہشت گردوں کا پولیس چیک پوسٹ پرحملہ ناکام بنا دیا گیا ہے۔ ترجمان پنجاب پولیس کے مطابق تھانہ وہواکی جھنگی چیک پوسٹ پر 15 سے 20 دہشت گردوں نے رات کی تاریکی میں حملہ کیا، ان کی جانب سے حملہ مختلف اطراف سے کیا گیا۔
ترجمان پنجاب پولیس کا کہنا ہے کہ دہشت گردوں کی جانب سے راکٹ لانچرز، ہینڈ گرینیڈ سمیت جدید اسلحہ بھی اس دوران استعمال کیا گیا، تاہم پولیس کی جوابی کارروائی سے حملہ ناکام بنا دیا گیا، اور اس دوران دہشت گرد فرار ہوگئے، جبکہ پولیس ٹیموں کا علاقے میں سرچ آپریشن جاری ہے۔
