یو اے ای میں بھی پیٹرول

یو اے ای میں بھی پیٹرول اور ڈیزل مہنگا، ٹول ٹیکس میں 50 فیصد اضافہ

ویب ڈیسک: یو اے ای میں بھی پیٹرول اور ڈیزل مہنگا ہو گیا جبکہ اس کے ساتھ ساتھ ٹول ٹیکس میں 50 فیصد اضافہ کر دیا گیا ہے۔
تفصیلات کے مطابق متحدہ عرب امارات میں پیٹرول اور ڈیزل کی قیمتوں میں اضافہ کر دیا گیا جبکہ ٹول ٹیکس بھی بڑھا دیا گیا۔ متحدہ عرب امارات میں پیٹرولیم مصنوعات کی قیمتوں میں چار سے ساڑھے 5 فیصد تک اضافہ کیا گیا ہے۔
اماراتی فیول پرائس کمیٹی کے اعلان کے مطابق یو اے ای میں ایک لیٹر پیڑول 2 اعشاریہ 74 درہم یعنی 208 پاکستانی روپے میں ملے گا جبکہ ڈیزل کی قیمت 2 اعشاریہ 82 درہم یعنی 214 روپے 18 پیسے فی لیٹر ہوگی۔ دوسری طرف دبئی میں ٹول ٹیکس بھی بڑھا دیا گیا۔
دبئی کے ٹریفک آپریشن کی نگرانی کرنے والے ادارے روڈ اینڈ ٹرانسپورٹ اتھارٹی نے ٹول ٹیکس سالک کی فیس میں 50 فیصد اضافہ کر دیا ہے، جس کے تحت اب دبئی کے ٹول گیٹس پر گزرنے کے لیے اضافی چارجز لاگو ہوں گے۔ ٹول ٹیکس کے نئے نرخوں کے مطابق صبح 6 بجے سے 10 بجے اور شام 4 بجے سے 8 بجے تک ٹول فیس 6 درہم وصول کی جائے گی جبکہ غیر مصروف اوقات کے دوران اور ہفتہ وار تعطیلات پر ٹول فیس 4 درہم ہی رہے گا۔
رمضان المبارک کیلئے بھی ٹول فیس کے اوقات تبدیل کر دیے گئے ہیں۔ دبئی چونکہ عالمی ایونٹس کا مقام ہے اس لیے ایونٹ زونز میں پبلک پارکنگ فیس 25 درہم فی گھنٹہ ہوگی جو دبئی ورلڈ ٹریڈ سینٹر کے قریب بڑے ایونٹس کے دوران وصول کی جائے گی۔

مزید پڑھیں:  چینی کی ذخیرہ اندوزی پر کریک ڈاؤن، کارخانو مارکیٹ میں دکان سیل