اگلی بار ہمارے مینڈیٹ پر ڈاکہ

اگلی بار ہمارے مینڈیٹ پر ڈاکہ ڈالا گیاتو پاکستان نہیں چل پائے گا،ایمل ولی

ویب ڈیسک: عوامی نیشنل پارٹی کے مرکزی صدر ایمل ولی خان نے کہا ہے کہ اگلی بار ہمارے مینڈیٹ پر ڈاکہ ڈالا گیاتو پاکستان نہیں چل پائے گا ۔
چارسدہ میں فخر افغان باچا خان کی 37ویں اور قائد جمہوریت خان عبدالولی خان کی 19ویں برسی کی مناسبت سے منعقدہ جلسہ سے خطاب کرتے ہوئے ایمل ولی خان نے کہا کہ گزشتہ تین انتخابات میں ہم جمہوریت، پاکستان اور نظام کی خاطر خاموش رہے اس کے بعد کوئی بھی ہماری راہ میں رکاوٹ بنا تو دمادم مست قلندر ہوگا ۔
انہوں نے کہا کہ ہمیں12سال حکومت سے باہر رکھا، ہمیں کمزور کرنے والے ناکام ہو ئے ہیں، ہم عدم تشدد کی سیاست پر یقین رکھتے ہیں، ہم جانتے ہیں گھی نکالنے کیلئے انگلی ٹیڑھی کرنی پڑتی ہے۔
جلسہ سے خطاب کرتے ہوئے ایمل ولی خان کا کہنا تھا کہ 1948 میں بابڑہ کے مقام پر ہمارے 600 سے زیادہ کارکنان شہید ہوئے تھے، ہمیں اپنے کارکنان پر فخر ہے۔
مرکزی صدر اے این پی کا کہنا تھا کہ پی ٹی آئی کے منتخب اراکین اسمبلی عوام سے دور بھاگتے ہیں، نو مئی کے فیصلوں سے ان کو بہت تکلیف ہوگی، آج حقیقت سننے کو کوئی تیار نہیں۔
ایمل ولی خان نے کہا کہ بانی پی ٹی آئی نے پختونخوا کے نو حلقے کھولنے کا فیصلہ کیا ہے، میرا مطالبہ ہے چارسدہ کے حلقے بھی کھولے جائیں، ہمیں تین بار ہرایا گیا، یہ نہیں ہو سکتا جہاں سے جیتے خیر ہے جہاں ہار ہو وہ حلقے کھولے جائیں۔
ان کا مزید کہنا تھا کہ اگلی بار اگر ہمارے مینڈیٹ پر ڈاکہ ڈالا گیا تو پھر پاکستان نہیں چلے گا، کسی کو اچھا لگے یا برا کرک میں جلسہ کروں گا۔
انہوں نے کہا کہ باچا خان اور خدائی خدمتگاروں کی تعلیمات کی روشنی میں ہمارا سفر جاری رہے گاہمارے اکابرین ہمارا فخر ہیں اور انہوں نے ساری عمر قوم کیلئے پرامن جدوجہد کی ہے۔

مزید پڑھیں:  ہمارے لیے ہمارا ملک امریکہ سب سے پہلے ہے، ٹرمپ