ویب ڈیسک: مقبوضہ مغربی کنارے میں صیہونی آپریشن کے باعث جنین پناہ گزین کیمپ میں دھماکوں سے کئی مکانات تباہ ہوگئے۔
تفصیلات کے مطابق اتوار کو مقبوضہ مغربی کنارے میں صیہونی آپریشن کے دوران جہاں علاقے میں خوف و ہراس پھیل گیا وہیں قابض اسرائیلی فورسز نے مغربی کنارے کے شہر جنین میں مہاجر کیمپ میں آپریشن کے دوران متعدد عمارتوں کو تباہ کر دیا۔
اسرائیلی فوج کے ترجمان کی جانب سے اس حوالے سے کہا گیا ہے کہ دہشت گردی کے خطرات کے پیشِ نظر جنین میں 23 عمارتیں تباہ کی گئیں، جبکہ یہ دعویٰ بھی کیا جا رہا ہے کہ اسرائیلی فوج نے جنوری کے وسط سے اب تک مغربی کنارے میں 50 فلسطینی جنگجوؤں کو شہید کیا ہے۔
فلسطینی وزارت خارجہ کی جانب سے جنین میں اسرائیلی فوج کی جانب سے عمارتوں کی تباہی کی مذمت کرتے ہوئے اسے وحشیانہ کارروائی قرار دیا، جہاں ایک طرف جنگ بندی اور دوسری طرف انہی ایام میں جنین پر چڑھائی ناقابل قبول ہے۔ اس صورتحال میں فلسطین کے صدر محمود عباس نے اقوام متحدہ کی سلامتی کونسل کا ہنگامی اجلاس بلانے کا مطالبہ کیا ہے تاکہ فلسطینی علاقوں جنین اور طولکرم کیمپوں میں رہائشی عمارتوں کی تباہی کو روکا جا سکے۔
