ویب ڈیسک: لبنان کی مزاحمتی تنظیم حزب اللہ کی جانب سے بتایا گیا ہے کہ حسن نصراللہ اور ہاشم صفی الدین کا جنازہ وتدفین 23فروری کو ہوگی، اس بات کے حوالے سے باقاعدہ اعلان حزب اللہ کے سیکرٹری جنرل نعیم قاسم نے آج اپنے ویڈیو پیغام میں کیا ہے۔
تفصیلات کے مطابق لبنان کی مزاحمتی تنظیم حزب اللہ نے اپنے 2 سابق سربراہان شہید سید حسن نصراللہ اور شہید ہاشم صفی الدین کے جنازے وتدفین کا اعلان کردیا۔ حزب اللہ کے سیکرٹری جنرل نعیم قاسم نے اعلان کیا ہے کہ سید حسن نصراللہ اور ہاشم صفی الدین کا جنازہ وتدفین 23 فروری کو ہوگی۔
انہوں نے کہا کہ حسن نصر اللہ کی شہادت کے بعد دوماہ تک جاری رہنے والی جنگ کے باعث حسن نصر اللہ کا جنازہ عوامی سطح پر نہیں کیا جاسکتا تھا، جس کی وجہ سے ان کی امانتاً تدفین کی گئی تھی تاہم اب ان کی نماز جنازہ بڑے عوامی اجتماع میں ادا کی جائے گی۔ دوسری طرف حسن نصر اللہ کے ساتھ ان کے جانشین سمجھے جانے والے ہاشم صفی الدین کی نماز جنازہ بھی ادا کی جائے گی۔
ان کا کہنا تھا کہ ہاشم صفی الدین کا جنازہ بھی بطور سیکرٹری جنرل حزب اللہ ہی ہوگا کیونکہ حسن نصر اللہ کی شہادت کے چند روز بعد ہی ہاشم صفی الدین کو حزب اللہ کا سیکرٹری جنرل منتخب کرلیا گیا تھا، تاہم ان کے سیکرٹری جنرل بننےکے اعلان سے ایک، دو روز قبل ہی وہ شہید ہوگئے تھے۔یاد رہے اسرائیلی فوج نے گزشتہ سال 27 ستمبر کو بیروت میں حزب اللہ کے ہیڈکوارٹر پر حملہ کرکے حسن نصر اللہ کو شہید کرنے کا دعویٰ کیا تھا اور حزب اللہ نے اگلے روز حسن نصر اللہ کی شہادت کی تصدیق کی تھی۔
