ویب ڈیسک: یوم یکجہتی کشمیر کے موقع پر صدر مملکت اور وزیراعظم پاکستان نے اپنے اپنے پیغامات میںکہا ہے کہ بھارت کشمیری عوام کو ریاستی جبر اور تشدد کا نشانہ بنا رہا ہے.
صدرمملکت آصف علی زرداری نے اس دن کی مناسبت سے اپنے خصوصی پیغام مٰیں کہا ہے کہ مقبوضہ جموں و کشمیر میں انسانی حقوق کی صورتحال انتہائی دگرگوں ہے، بھارت کشمیریوں کو نہ صرف ان کے بنیادی حقوق سے محروم کر رہا ہے بلکہ ان پر عرصہ حیات بھی تنگ کر رکھا ہے ۔
انہوں نے مزید کہا کہ بھارت کشمیری عوام کو ریاستی جبر اور تشدد کا نشانہ بنا رہا ہے، اقوام متحدہ کشمیریوں سے 77 سال قبل کئے گئے وعدوں کا احترام کرے، اور انہیں ان کا حق دلانے میںکردار ادا کرے ، پاکستان ہمیشہ کشمیریوں کے ساتھ کھڑا رہے گا، اس کے ساتھ ساتھ ہم کشمیریوں کی اخلاقی، سفارتی اور سیاسی حمایت جاری رکھیں گے۔
وزیراعظم شہباز شریف نے اپنے پیغام میںکہا ہے کہ حق خود ارادیت عالمی قانون کا ایک بنیادی اصول ہے، کشمیری خوف اور دہشت کے ماحول میں جی رہے ہیں، ان کی مشکلات کو دیکھتے ہوئے اقوام متحدہ کو اپنی قراردادوں کو عملی جامہ پہنانا چاہئے، دیرینہ تنازعات کو مزید طول نہیں دیا جانا چاہیے۔
انہوں نے کہا کہ مقامی لوگوں کی حقیقی امنگوں کو دبا کر دیرپا امن حاصل نہیں کیا جا سکتا، جموں و کشمیر کا تنازعہ ہماری خارجہ پالیسی کا ایک اہم حصہ ہے ، جنوبی ایشیا میں پائیدار امن کے مفاد میں عالمی برادری کو بھارت پر زور دینا چاہیے کہ وہ کشمیری عوام کو آزادانہ طور پر اپنے مستقبل کا فیصلہ کرنے کی اجازت دے۔
