ویب ڈیسک: جمعیت علماء اسلام (ف) کے سربراہ مولانا فضل الرحمان نے کہا ہے کہ اقوام متحدہ کشمیر میں استصواب رائے کے حوالے سے اپنی ذمہ داریاں پوری نہ کر سکا ، کشمیری عوام پر مظالم کے پہاڑ توڑے جا رہے ہیں، بھارت کے کشمیر پر غاصبانہ تسلط کا عالمی برادری نوٹس لے، 5 فروری ظلم کیخلاف جدوجہد، آزادی کی تحریک کا دن ہے۔
مولانا فضل الرحمان کا یوم یکجہتی کشمیر کے دن کی مناسبت سے کہنا تھا کہ اقوام متحدہ کی قرارداد پر عملدرآمد میں بھارت کا منفی رویہ اور ہٹ دھرمی رکاوٹ ہے، اقوام متحدہ کشمیر میں استصواب رائے کے حوالے سے اپنی ذمہ داریاں پوری نہ کر سکا ہے۔
انہوں نے کہا کہ سات دہائیاں گزرنے کے باوجود اقوام متحدہ کی جانب سے 1948 اور 1949 کی قراردادوں پر عملدرآمد کیلئے کوئی ٹھوس اقدامات نہیں اٹھائے گئے،ہمارے حکمرانوں نے کشمیریوں کے خون اور ناموس کو اپنی سیاست کے لئے استعمال کیا ہے۔5 فروری ظلم کیخلاف جدوجہد، آزادی کی تحریک کا دن ہے، آخر اقوام متحدہ کشمیر کیلئے کب حرکت میں آئے گی؟
قائد جمیعت نے مزید کہا کہ کشمیر کے شہیدوں کا خون رائیگاں نہیں جائے گا، بھارت کے مظالم تاریخ کا سیاہ ترین باب ہے، عالمی طاقتیں بھارتی ظلم پر کب بولیں گی؟
