ویب ڈیسک: خیبرپختونخوا حکومت کی جانب سے ماہ رمضان کے پیش نظر میٹرک اورانٹر کے سالانہ امتحانات ملتوی کر دیئے گئے۔ صوبائی حکومت نے تمام تعلیمی بورڈز کو میٹرک کے امتحانات ملتوی کرنے کا حکم دیتے ہوئے یہ امتحانات رمضان کے بعد اپریل میں لینے کی ہدایات جاری کی ہیں۔
ترجمان پشاور تعلیمی بورڈ کے مطابق امتحانات ماہ رمضان کے بعد لیے جائیں گے، جبکہ امتحانات ملتوی کرنے کا مقصد رمضان کے دوران طلباء کو سہولت دینا ہے۔ صوبے میں میٹرک سالانہ امتحانات 5 مارچ کو شیڈول تھے، تاہم اب التوا کے بعد میٹرک کے سالانہ امتحانات 8 اپریل کو شروع ہوں گے۔
چیئرمین پشاور بورڈ نصراللہ خان کا کہنا تھا کہ اس حوالے سے اعلامیہ تمام تعلیمی بورڈز کے چیئرمین کے اجلاس میں اسی ہفتے جاری کر دیا جائے گا۔ خیبرپختونخوا میں انٹر کے امتحانات اب 10 اپریل کے بجائے 7 مئی کو شروع ہوں گے۔ یاد رہے کہ خیبرپختونخوا حکومت کی جانب سے ماہ رمضان کے پیش نظر میٹرک اورانٹر کے سالانہ امتحانات ملتوی کر دیئے گئے۔
