مہنگائی میں کمی کا آنا

مہنگائی میں کمی کا آنا معاشی بہتری کا اشارہ ہے، نواز شریف

ویب ڈیسک: پاکستان مسلم لیگ ن کے صدر اور سابق وزیراعظم میاں نواز شریف نے کہا ہے کہ ملک میں مہنگائی کی رفتار میں کمی کا آنا معاشی بہتری کا اشارہ ہے۔
سابق وزیراعظم نواز شریف اور وزیرِ اعلیٰ پنجاب مریم نواز سے ارکان پنجاب اسمبلی نے ملاقات کی جس میں ملک کی مجموعی صورتحال، پنجاب میں ترقیاتی کام اور عوام کی خدمت کے منصوبوں پر غورکیا گیا۔
اراکین پنجاب اسمبلی سے گفتگو کرتے ہوئے نوازشریف نے کہا کہ مہنگائی کی رفتار میں کمی کا آنا معاشی بہتری کا اشارہ ہے۔
انہوں نے کہا کہ اسٹاک ایکسچینج کی بلندی کاروباری اور سرمایہ کار برادری کے اعتماد کی جھلک ہے، ترقی کی طرف سفر کی رفتار کا بڑھنا خوشگوار تبدیلی کی آمد کی علامت ہے۔
میاں نواز شریف نے مزید کہا کہ پاکستان کو جس پستی کی طرف دھکیل دیاگیا تھا اس میں ٹھہرا آنا خوش آئند ہے وزیر اعظم شہباز شریف وفاق میں بڑی محنت سے کام کررہے ہیں، جبکہ مریم نواز پنجاب میں ایک ماں اور بیٹی کے جذبے سے کام کر رہی ہیں۔
انہوں نے کہا کہ اللہ تعالی بھی ان کا ہاتھ پکڑتا ہے جو نیک نیتی اور محنت سے مخلوق کی خدمت کرتے ہیں، اس موقع پر اراکین پنجاب اسمبلی نے ترقیاتی کاموں اور عوامی منصوبوں پر وزیرِ اعلی مریم نواز کو خراج تحسین پیش کیا اور کہا کہ میاں صاحب آپ مریم نواز جیسی بہادر اور لائق بیٹی پر جتنا فخرکریں کم ہے۔
اس موقع پر وزیراعلیٰ پنجاب مریم نواز نے کہا کہ آپ سب کی رہنمائی اور اعتماد ہی ہماری قوت اور کامیابی کی کلید ہے، عوامی خدمت کے معیار اور رفتار کے ذریعے ماضی کی روایت کو آگے بڑھا رہے ہیں۔

مزید پڑھیں:  مطالبات کی منظوری، بلدیاتی نمائندگان کی حکومت کو 10فروری تک ڈیڈلائن