ویب ڈیسک: اسلام آباد ہائیکورٹ کے دو ججز چھٹی پر چلے گئے جس کے باعث آج اور کل مقرر کیسز کی کاز لسٹ منسوخ کر دی گئی ۔
تفصیلات کے مطابق اسلام آباد ہائیکورٹ کے جج جسٹس طارق محمود جہانگیری اور جسٹس بابر ستار دونوں دو دن کی چھٹی پر گئے ہیں جس کے نتیجے میں اہم کیسز کی سماعت ملتوی ہو گئی ہے ۔
پولیس سمیت اسلام آباد کے مقامی محکموں میں دوسرے صوبوں سے بھرتیوں کے حوالے سے کیس کی کاز لسٹ بھی منسوخ کر دی گئی۔
جسٹس بابر ستار کی عدم دستیابی کے سبب لارجر بنچ کی کاز لسٹ بھی منسوخ ہو گئی ہے۔
اسلام آباد ہائیکورٹ کے لارجر بنچ نے اٹارنی جنرل کو معاونت کے لیے آج طلب کیا تھا اور اسلام آباد پولیس میں بھرتیوں کے نتائج روکنے کے حکم میں بھی آج 6 فروری تک کی توسیع دی گئی تھی، اس کیس کی جسٹس محسن اختر کیانی، جسٹس بابر ستار اور جسٹس سردار اعجاز اسحاق خان پر مشتمل بنچ کو سماعت کرنی تھی۔
