ویب ڈیسک: صوبائی دارالحکومت پشاور کے ارباب نیاز سٹیڈیم میں چیمپئنز ٹرافی کی تقریب رونمائی بدانتظامی کا شکار ہو گئی۔
تفصیلات کے مطابق ارباب نیاز کرکٹ سٹیڈیم میں آئی سی سی چیمپیئنز ٹرافی کی تقریب رونمائی بدانتظامی کا شکار رہی، کسی حکومتی اور محکمہ کھیل کے ذمہ داروں نے تقریب میں شرکت نہیں کی۔
ذرائع کے مطابق ٹرافی مختصر وقت کے لیے ارباب نیاز سٹیڈیم میں رکھی گئی، اور اس کے بعد اسے واپس اسلام آباد منتقل کر دیا گیا۔ آئی سی بی چیمیئنز ٹرافی پشاور یونیورسٹی سے ارباب نیاز کرکٹ سٹیڈیم لائی گئی جہاں ٹرافی وصول کرنے کے لیے کوئی حکومتی شخصیت اور محکمہ کھیل کی کوئی شخصیت موجود نہیں تھی۔
پشاور سے تعلق رکھنے والی قومی کرکٹ ٹیم کے موجودہ اور سابقہ کھلاڑیوں میں سے کسی کو دعوت نہیں دی گئی۔ یاد رہے کہ آئی سی سی چیمپیئنز ٹرافی آج پشاور پہنچی تھی جسے پشاور یونیورسٹی اور ارباب نیاز کرکٹ سٹیڈیم لے جایا گیا، جہاں سے اسے فوری اسلام آباد پہنچا دیا گیا۔ صوبائی دارالحکومت پشاور کے ارباب نیاز سٹیڈیم میں چیمپئنز ٹرافی کی تقریب رونمائی بدانتظامی کا شکار ہو گئی۔
