ویب ڈیسک: صوبائی دارالحکومت پشاور کے ایک سکول میں طلباء کا استاد کو ہراساں کرنے کا واقعہ رپورٹ ہوا ہے، جس پر جہاں ڈی ای او نے ایکشن لیا ہے، وہیں متاثرہ استاد نے پولیس میں بھی رپورٹ درج کرا دی ہے۔
ذرائع کے مطابق متاثرہ ٹیچر نے بتایا کہ سکول کے طلباء مجھ پر آوازیں کستے ہیں، نازیبا الفاظ کا استعمال کرتے ہیں، انہوں نے درخواست میں مؤقف اپنایا کہ طلباء کی طرف سے ڈیوٹی میں رکاوٹ ڈالنا اب معمول بن گیا ہے۔
سکول ٹیچر نے پولیس کو بھی طلباء کیخلاف درخواست دے دی، اس کے ساتھ ساتھ ڈسٹرکٹ ایجوکیشن آفیسر پشاور عرفان علی نے بھی اس واقعے کا نوٹس لے لیا۔ ڈی ای او نے طلباء کے والدین کو بلا کر معاملہ سامنے رکھا، جس کے بعد طلباء نے معافی مانگی اور مستقبل میں ایسا نہ کرنے کی یقین دہانی کرائی۔
ڈسٹرکٹ ایجوکیشن آفیسر پشاور کا کہنا تھا کہ سکولوں کے ڈسپلن اور تعلیمی ماحول کو خراب کرنے کی اجازت کسی کو نہیں دیں گے۔
