ویب ڈیسک: جمعیت علمائے اسلام کے ترجمان اسلم غوری نے کہا ہے کہ دھاندلی زدہ انتخابات نے پاکستان کے امن اور معیشت کو تباہ کردیا۔
اپنے بیان میں ترجمان جے یو آئی اسلم غوری کا کہنا تھا کہ عوامی مینڈیٹ تسلیم نہ کرنے پر ملک ٹوٹا مگر ہم نے سبق نہیں سیکھا، جعلی انتخابات نے جمہوریت کو کمزور کردیا ہے۔
اسلم غوری نے کہا کہ تسلسل کے ساتھ دھاندلی زدہ انتخابات نے پاکستان کے امن اور معیشت کو تباہ کردیا، دوست ممالک سے بھیک مانگ کر گزارہ کرتے کرتے دہائیاں گزر گئیں لیکن قوم اب تک نان شبینہ کی محتاج ہے۔
انہوں نے کہا کہ جعلی مینڈیٹ والی حکومتوں نے ملک کی معیشت اور امن کو برباد کر دیا،دھاندلی کی پیدوار حکومت کو عالمی مالیاتی ادارے اور بیرونی قوتیں دبا میں رکھتی ہیں۔
انہوں نے کہا کہ جعلی انتخابات نے جمہوریت کو کمزور کردیا ہے، 2018 کے بعد 2024 کے انتخابات میں دھاندلی کے ریکارڈز توڑ دیے گئے عوامی مینڈیٹ کو تسلیم نہ کرنے پر ملک دو لخت ہوا لیکن ہم نے سبق نہیں سیکھا۔
اپنے بیان میں انہوں نے مزید کہا کہ جے یو آئی کا واضح موقف ہے کہ جب تک صاف شفاف انتخابات نہیں ہوتے ،امن ،ترقی اور جمہوریت خواب ہی رہیں گے۔
