ویب ڈیسک: وزیر دفاع خواجہ آصف نے کہا ہے کہ ایک تقریب کے دوران کہا کہ بحری تجارت کا معیشت میں بنیادی کردار ہے، اس لئے سمندری تجارت کا تحفظ ہمارا مشترکہ فرض ہے، آج تجارتی ٹیرف ایک بڑاچیلنج بن کر سامنے آیا ہے۔
تفصیلات کے مطابق پاک بحریہ کی امن مشقوں کے تیسرے روز کراچی میں محفوظ سمندر، خوشحال مستقبل کے عنوان سے پہلے امن ڈائیلاگ کی افتتاحی تقریب منعقد ہوئی جس میں امن ڈائیلاگ میں شریک ممالک کی بحری افواج کے چیف آف نیول سٹاف اوردیگر عہدیداران نے شرکت کی، اس تقریب کے مہمان خصوصی وزیردفاع خواجہ آصف تھے۔
امن ڈائیلاگ کی افتتاحی تقریب سے خطاب کرتے ہوئے خواجہ آصف کا کہنا تھا کہ دنیا بڑی معاشی تبدیلیوں سے گزررہی ہے، آج تجارتی ٹیرف بڑاچیلنج بن کر سامنے آیاہے، سمندری تجارت کے تحفظ کیلئے مشترکہ کوششیں کرنا ہم سب کا اجتماعی فرض ہے۔
انہوں نے کہا کہ عالمی معاشی نظام میری ٹائم پر انحصار کرتا ہے، بحرہند عالمی تیل اور گیس کے 50فیصد ذخائر رکھتا ہے، بحری تجارت کا معیشت میں بنیادی کردار ہے، بحری شعبے میں درپیش غیر روایتی چیلنجز سے نمٹنے کیلئے اجتماعی اقدامات ناگزیر ہیں، انہی سے ملکی معیشت جڑا ہوا ہے۔
خواجہ آصف کا مزید کہنا تھا کہ پاک بحریہ علاقائی امن اور سلامتی کے لیے اہم کردارادا کر رہی ہے، مصنوعی ذہانت اورٹیکنالوجی کے انقلاب نے عالمی منظر نامہ بدل دیا ہے۔
