ویب ڈیسک: خیبرپختوانخوا حکومت کا طلبہ میں مصنوعی ذہانت سے متعلق آگاہی پیدا کرنیکا فیصلہ، 4رکنی کمیٹی تشکیل دیدی گئی۔
تفصیلات کے مطابق خیبر پختونخوا حکومت کی جانب سے طلبہ میں مصنوعی ذہانت سے متعلق آگاہی پیدا کرنے کا فیصلہ کیا گیا ہے، اس سلسلے میں محکمہ اعلی تعلیم خیبر پختونخوا نے 4رکنی کمیٹی تشکیل دیدی ہے۔
اس حوالے سے جاری اعلامیہ میں بتایا گیا ہے کہ کمیٹی مصنوعی ذہانت کی نجی اور سرکاری جامعات اور کالجز میں آگاہی کیلئے آگاہی پلان مرتب کریگی، کمیٹی کے کنوینئر مشیر کوالٹی اشورنس سیل محکمہ اعلی تعلیم پروفیسر ڈاکٹر شفیق الرحمن ہونگے۔
صوبائی وزیر اعلی تعلیم مینا خان آفریدی نے اس حوالے سے بتایا ہے کہ دنیا بھر میں بیشتر کام اب مصنوعی ذہانت کی مدد سے کئے جا رہے ہیں، خیبرپختونخوا کے طلبہ میں بھی اس حوالے سے آگاہی لازمی ہے، بنائی گئی کمیٹی ایک ہفتے کے اندر اپنی سفارشات اور آگاہی پلان جمع کردے گی۔
انہوں نے کہا کہ کمیٹی کی سفارشات کی روشنی میں آگاہی پلان پر عمل درآمد کی منصوبہ بندی کی جائیگی۔
