ویب ڈیسک: پاکستان تحریک انصاف کے بانی اور سابق وزیراعظم عمران خان نے کہا ہے کہ پارلیمنٹ فنکشنل نہیں، پاکستان میں جمہوریت ختم ہو چکی ہے، آرمی چیف کو دو خط اس لیے بھیجے کہ جمہوری راستے جو بھی تھے سب ختم کر دیے گئے۔
تفصیلات کے مطابق آرمی چیف جنرل عاصم منیر کو خط لکھنے کی وجہ بتاتے ہوئے اڈیالہ جیل میں بانی پی ٹی آئی عمران خان نے کہا کہ آرمی چیف کو دو خط اس لیے بھیجے کہ جمہوری راستے جو بھی تھے سب ختم کر دیے گئے، پہلے سنسر شپ تھی، اب پیکا آگیا اور سوشل میڈیا کو بھی روک دیا گیا۔
صحافیوں سے غیر رسمی گفتگو میں انہوں نے کہا کہ پارلیمنٹ فنکشنل نہیں، وزیراعظم، صدر اور وزراء جعلی ہیں، پارلیمنٹ سے کوئی امید نہ پہلے تھی نہ اب ہے اسی لئے حکومت سے بات چیت ختم کر دی۔ ہم نے 8 فروری کا نہیں کہا صرف 9 مئی اور 26 نومبر کے لیے جوڈیشل کمیشن کا کہا تھا۔
انہوں نے کہا کہ ان کے صرف دو مقاصد ہیں، ایک 8 فروری کی دھاندلی نہ کھلے اور دوسرا پی ٹی آئی کو جیلوں میں رکھیں، ایسے میں بات چیت کا کیا فائدہ؟ بات چیت کا کوئی فائدہ نہیں۔ پاکستان کی جمہوریت آج ختم ہو چکی ہے، ورلڈ جسٹس پروجیکٹ کے رول آف لاء انڈیکس میں پاکستان کا نمبر 142 میں سے 140 ویں نمبر پر ہے۔
انہوں نے مزید کہا کہ جسٹس یحییٰ آفریدی کو کہنا چاہتا ہوں کہ قوم آپ کی طرف دیکھ رہی ہے، چیف جسٹس پاکستان کو قانون اور انصاف کے ساتھ کھڑے ہونے کی ضرورت ہے، یاد رہے گزشتہ دنوں سابق وزیراعظم عمران خان نے آرمی چیف جنرل عاصم منیر کو خط لکھے تھے جن میں پالیسیاں تبدیل کرنے کی درخواست کی گئی تھی۔
