ویب ڈیسک: وزیراعظم پاکستان شہباز شریف نے کہا کہ آئی ایم ایف پروگرام کے بعد پالیسی ریٹ میں نمایاں کمی ہوئی ، جبکہ جنوری میں ترسیلات زر تین ارب ڈالر تک پہنچ چکی، یہ ایک مثبت پیش رفت ہے۔
دبئی میں پاکستانی تاجروں اور سرمایہ کاروں سے گفتگو کرتے ہوئے وزیراعظم پاکستان شہباز شریف کا کہنا تھا کہ ہماری توجہ طویل المدتی اصلاحات پر مرکوز ہے، اگر ہم نے ملکی ترقی کیلئے کام کرنا تو ایک ٹیم بن کر کام کرنا ہوگا، اسی کی بدولت پائیدار ترقی کا خواب شرمندہ تعبیر ہو سکتا ہے۔
انہوں نے کہا کہ آئی ایم ایف پروگرام کے بعد پالیسی ریٹ میں نمایاں کمی ہوئی جس کی بدولت جنوری میں ترسیلات زر تین ارب ڈالر تک پہنچ چکی ہیں، ادحر گزشتہ مالی سال کے مقابلے میں برآمدات میں بھی اضافہ ہوا ہے۔
شہباز شریف کا کہنا ہے کہ پاکستان معدنی وسائل سے مالا مال ملک ہے، معدنیات وافر مقدار میں موجود ہے، جسے نکالنے کیلئے کان کنی کے شعبے پر توجہ دی جائے تو اس سے بہت فائدہ ہو سکتا ہے، جبکہ آئی ٹی کے شعبے میں بھی بے پناہ صلاحیت موجود ہے، نوجوانوں کو اے آئی اور آئی ٹی ٹیکنالوجی میں تربیت فراہم کر کے ترقی کے بے پناہ مواقع دیے جا سکتے ہیں۔
یاد رہے وزیرِ اعظم شہباز شریف دو روزہ سرکاری دورے پر متحدہ عرب امارات پہنچ چکے ہیں، نائب وزیرِاعظم اسحاق ڈار، وفاقی وزراء خواجہ آصف، احد چیمہ، محمد اورنگزیب، اویس لغاری، عطاءاللّٰہ تارڑ اور معاون خصوصی طارق فاطمی وزیراعظم کے ہمراہ موجود ہیں۔
