ویب ڈیسک: پاکستان تحریک انصاف کے رہنما شیر افضل مروت نے پارٹی جلسوں میں بلائے بغیر شرکت نہ کرنےکا فیصلہ کرتے ہوئے کہا ہے کہ کسی جلسے میں نہیں جاؤں گا، جب تک قیادت خود نہ بلائے۔
انہوں نے کہا کہ میں نے تو ہمیشہ پی ٹی آئی کے حق کی بات کی ہے، میں نہیں چاہتا کہ قیادت میری وجہ سے تکلیف محسوس کرے، کچھ لوگ مجھے اسٹیج پر تقریر کرتے نہیں دیکھنا چاہتے، جبکہ میرا بھِ مقصد نہیں کہ کسی کو بلا وجہ تکلیف دوں۔
یاد رہے حال ہی میں صوابی میں ہونے والے پی ٹی آئی جلسے کے دوران شیر افضل مروت کو سٹیج پر جگہ نہیں ملی تھی اور نہ ہی انہیں تقریر کا موقع دیا گیا تھا۔
اس صورتحال میں انہوں نے شکوہ کرتے ہوئے کہا تھا کہ صوابی جلسے میں بیٹھنے کے لیے مناسب جگہ ملی نہ ہی تقریر کا موقع ملا، اگر قیادت میرے آنے پر ناخوش تھی تو پہلے بتا دیتی، میں آتا ہی نا۔
انہوں نے مزید کہا کہ میں صرف بانی پی ٹی آئی کی وجہ سے آیا تھا، میرے جلسے جلوس میں شرکت سے قیادت کو مسئلہ ہو تو بتا دیں، جبکہ اب فیصلہ کیا ہے کہ کسی جلسے میں نہیں جاؤں گا، جب تک قیادت خود نہ بلائے۔
