ویب ڈیسک: جمعیت علمائے اسلام کے سربراہ مولانا فضل الرحمان نے کہا ہے کہ موجودہ حکومت دھاندلی کی پیداوار ہے ،چیف الیکشن کمشنر سکندر سلطان راجہ ناکام ثابت ہوئے ہیں ۔
اسلام آباد میں صحافیوں سے گفتگو کرتے ہوئے مولانا فضل الرحمان نے کہا کہ چیف الیکشن کمشنر نے اپنی ذمہ داریاں ٹھیک طرح سے نہیں نبھائیں،چیف الیکشن کمشنر مکمل طورپرناکام ہوئے ہیںانہیں چلے جانا چاہئے تاکہ نئے لوگ آئیں۔
سربراہ جمعیت نے مزید کہا کہ حکومت دھاندلی کی پیداوار ہے مجھے اس پر تحفظات ہیں، موجودہ چیف الیکشن کمشنر سے آئندہ منصفانہ الیکشن کی امید رکھنا حماقت ہوگی۔
آئی ایم ایف وفد کی چیف جسٹس سے ملاقات پر مولانا فضل الرحمان کا کہنا تھا کہ یہ پاکستان اور دنیا کی تاریخ کا پہلا واقعہ ہے، ملاقات سے ظاہر ہوتا ہے کہ معیشت کا عدل و انصاف سے براہ راست تعلق ہے اور آئی ایم ایف کو ہمارے نظام انصاف پر تحفظات ہیں۔
ان کا کہنا تھاکہ اپوزیشن کا آپس میں بات چیت کا سلسلہ جاری رہے گا،26ویں آئینی ترمیم پرتحفظات ہیں، ججز تقرری میں پہلے بھی پارلیمنٹ کا کردار تھا، اب دوبارہ لیا گیا۔
انہوں نے کہا کہ ہماری رائے میں آئینی بینچ کا بننا برا آغاز نہیں، آئینی بینچ کو چلنے دیا جائے تو بہتر نتائج آئیں گے۔
مولانا فضل الرحمان نے مزید کہا کہ مدارس رجسٹریشن سے متعلق حکومت کی طرف سے پیشرفت نہیں ہو رہی، وفاق اور صوبوں کو اپنی ذمہ داری بغیر دبا ئوکے پوری کرنی چاہیے۔
