ویب ڈیسک: پاکستان تحریک انصاف (پی ٹی آئی ) کی جانب سے آئی ایم ایف مشن کوڈوزیئر اور خط بھیج دیاگیا۔
پاکستان تحریک انصاف کے سینئر رہنماء اور قومی اسمبلی میں اپوزیشن لیڈر عمر ایوب خان نے تصدیق کی ہے کہ اسلام آباد میں آئی ایم ایف مشن کوڈوزیئر اورخط بھیج دیا ہے۔
عمر ایوب کے آئی ایم ایف کو خط میں کہا گیا ہے کہ دھاندلی سے متعلق شواہد پر مشتمل ڈوزیئرچیف جسٹس پاکستان کوبھی بھیجا جاچکا ہے، ڈوزیئرمیں عام انتخابات میں دھاندلی سے متعلق شواہد موجودہیں۔
ان کا کہنا تھاکہ آئی ایم ایف مشن کو الیکشن 2024سے متعلق غیر سرکاری تنظیم پتن کی رپورٹ بھی بھجوائی گئی ہے، ڈوزیئر میں انتخابی دھاندلی سے متعلق تفصیلات منسلک کی گئی ہیں۔
انہوں نے کہا کہ چیف جسٹس کو بھجوائے گئے خط اور تفصیلات کو بھی آئی ایم ایف وفد کو بھجوایا گیا ہے۔
خط کے متن کے مطابق بانی پی ٹی آئی نے7جولائی 2023 کو آئی ایم ایف وفد سے ملاقات کی تھی جس میں انہوں نے قانون کی بالادستی کیلئے شفاف انتخابات کے انعقاد پر زور دیا تھا۔
عمرایوب کا خط میں کہنا ہے کہ ڈوزیئرمیں شواہد ہیں کہ کس طرح پی ٹی آئی کو دبایا جارہا ہے، ڈوزیئرمیں حقائق اورشواہدموجودہیں کہ کس طرح پی ٹی آئی سے مینڈیٹ چھینا گیا۔
انہوں نے خط میں کہا ہے کہ سیاسی اورمعاشی استحکام کیلئے ضروری ہے کہ ہمارے تحفظات پرتوجہ دلائی جائے۔
عمر ایوب کا کہنا تھا کہ ہمارے تحفظات پرعالمی تنظیموں سمیت متعلقہ اسٹیک ہولڈرزکی توجہ دلائی جائے، یقین ہے کہ پاکستان کے مستقبل سے متعلق تمام امورمیں قانون کی حکمرانی کو ترجیح دی جائیگی اور ہمیں یقین ہے کہ جمہوری اصولوں کی پاسداری کو ترجیح دی جائے گی۔
