ویب ڈیسک: ترک صدر رجب طیب اردوان دو روزہ دورے پر پاکستان پہنچ گئے، ان کا استقبال صدر مملکت اور وزیراعظم نے کیا ، دیگر وزراء بھی اس موقع پر موجود تھے.
تفصیلات کے مطابق وزیراعظم شہباز شریف کی دعوت پر ترک صدر رجب طیب اردوان دو روزہ دورے پر پاکستان پہنچ گئے۔ ترکیہ کے صدر کا طیارہ نور خان ایئربیس پر لینڈ کر گیا، جہاں صدر مملکت آصف زرداری، وزیراعظم شہباز شریف سمیت وفاقی وزرا اور دیگر حکام موجود تھے۔
ترک صدر کا ایئرپورٹ پر ریڈ کارپٹ پرتپاک استقبال کیا گیا اور پھر انہیں گارڈ آف آنر بھی پیش کیا گیا، ترک صدر کی آمد پر ان کے اعزاز میں 21 توپوں کی سلامی بھی دی گئی جبکہ روایتی لباس میں ملبوس سکول کے بچوں نے ان کو خوش آمدید کہا.
پاکستان کی فضائی حدود میں داخل ہونے کے بعد پاک فضائیہ کے جے ایف 17 طیاروں نے ان کا فضائی استقبال کیا اور ان کے جہاز کو حصار میں اسلام آباد لایا گیا۔
اپنے دورے کے دوران ترکیہ کے صدر اسلام آباد میں اعلیٰ سطح سٹریٹجک تعاون کونسل اور پاکستان ترکیہ بزنس فورم میں شرکت کریں گے، علاوہ ازیں ترک صدر پاکستان اور ترکیہ کے مابین مختلف شعبوں میں مفاہمتی یادداشت اور معاہدوں پر دستخط کی تقریب میں بھی شرکت کریں گے۔
