ویب ڈیسک: انٹراپارٹی انتخابات کیس کے حوالے سے الیکشن کمیشن کی جانب سے پیپلزپارٹی کو جواب جمع کرانے کیلئے 12مارچ تک مہلت دیدی گئی ہے۔
اس حوالے سے ممبر سندھ نثار درانی کی سربراہی میں تین رکنی بنچ نے سماعت کی۔ اس دوران وکیل پیپلز پارٹی ساجد تنولی نے مؤقف اختیار کیا کہ پارٹی چیئرمین امریکا میں ہیں اور سینیٹر فاروق ایچ نائیک اپنی سینیٹ کی مصروفیات کی وجہ سے دستیاب نہیں، اس لئے جواب جمع کرانے کیلئے مہلت دی جائے۔ ممبر سندھ نثار درانی نے نشاندہی کی کہ پیپلزپارٹی نے 6 جنوری 2021 کو انٹرا پارٹی انتخابات کرائے تھے، ان کے انتخابات چار سال کیلئے ہوتے ہیں، چار سال میں الیکشن نہ کرانے پر شوکاز نوٹس جاری ہوا۔
ممبر پنجاب نے استفسارکیا کہ جواب جمع کرانے کیلئےکتنا وقت درکار ہے، جس پر وکیل پیپلز پارٹی نے مزید ایک ماہ کی مہلت کی درخواست کی۔ بعدازاں الیکشن کمیشن نے 12 مارچ تک جواب جمع کرانے کا وقت دیتے ہوئے سماعت ملتوی کر دی۔ یاد رہے کہ انٹراپارٹی انتخابات کے حوالے سے الیکشن کمیشن کی جانب سے پیپلزپارٹی کو جواب جمع کرانے کیلئے 12مارچ تک مہلت دیدی گئی ہے۔
