ویب ڈیسک: بھارت کو جدید ہتھیاروں کی فراہمی کا امریکی اعلان باعث تشویش ہے، ہم انڈو یو ایس مشترکہ بیان کو بے بنیاد اور اقدار کے خلاف قرار دیتے ہیں۔ یہ باتیں ترجمان دفتر خارجہ نے ہفتہ وار پریس بریفنگ کے دوران بتائیں۔
ترجمان دفتر خارجہ شفقت علی خان نے کہا ہے کہ بھارت کو جدید ہتھیاروں کی فراہمی کا امریکی اعلان باعث تشویش ہے، ہم انڈو یو ایس مشترکہ بیان کو بے بنیاد اور اقدار کے خلاف قرار دیتے ہیں۔ دہشت گردی سے متاثرہ ملک کے طور پر پاکستان دنیا میں امن کا خواہاں ہے، اور سب سے زیادہ دہشت گردی سے پاکستان ہی متاثر رہا ہے، ہماری دفاعی تیاریاں کسی کے خلاف جارحانہ عزائم کیلئے نہیں صرف اپنے دفاع کے لیے ہیں۔
انہوں نے کہا کہ لیبیا کشتی حادثہ میں 16 لاشوں کی شناخت کی جا چکی ہے، نعشوں کی واپسی کے لیے کوشاں ہیں، جبکہ اس کے ساتھ ساتھ دیگر نعشوں کی شناخت میں بھی پاکستانی سفارتخانہ مصروف عمل ہے۔
ان کا کہنا تھا کہ امریکہ کی جانب سے غیر قانونی تارکین وطن کی واپسی کا معاملہ پاک امریکہ باہمی رابطے کا حصہ ہے، کوئی بھی ملک غیر قانونی تارکین وطن کو واپس بھیج سکتا ہے، یہ کام سب کر سکتے ہیں۔
میڈیا سے گفتگو میں شفقت علی خان کا کہنا تھا کہ کشمیر میں دو نوجوان شہید کئے گئے، پاکستان اس کی شدید مذمت کرتا ہے، کشمیری عوام کو اقوام متحدہ کے اصولوں کے مطابق حق خودارادیت ملنا چاہئے۔
