ویب ڈیسک: مسلم لیگ ن کے سینئر رہنما حنیف عباسی نے کہا کہ بانی پی ٹی آئی عمران خان کو معافی کسی اور جگہ سے نہیں بلکہ صرف وزیراعظم سے ہی ملنی ہے ۔
اپنے بیان میں حنیف عباسی نے کہا کہ بانی پی ٹی آئی عمران خان منت ترلوں پر آگئے ہیں، پہلے قوم سے معافی مانگیں کیوںکہ انہوں نے ملکی سالمیت پر حملے کیے، ان کے ہینڈلرز نے ان کو خطوط لکھنے کی لائن دی ہے۔
رہنما ن لیگ نے کہا کہ عمران خان خطوط کے ذریعے دوبارہ فوج پر حملہ آور ہوئے، 9 مئی کو حساس مقامات کو جلایا گیا، بانی پی ٹی آئی اور ان کے ہینڈلرز کامیاب نہیں ہوں گے۔
نہوں نے کہا کہ عالمی ادارے پاکستان کی معاشی بہتری کا اعتراف کر رہے ہیں، حکومتی اقدامات سے ملک ترقی کی راہ پر گامزن ہے، عوام نے انتشار اور فساد کی سیاست کو مسترد کر دیا ہے۔
حنیف عباسی نے کہا کہ سرمایہ کاروں کا پاکستان پر اعتماد بڑھ رہا ہے، برآمدات اور ترسیلات زر میں اضافہ ہو رہا ہے، کسی کو ملکی مفادات کے خلاف کام کرنے کی اجازت نہیں دی جاسکتی۔
