ویب ڈیسک:یوکرینی صدر ولادی میر زیلنسکی نے کہا ہے کہ ہم انسانی بنیادوں پر قیدیوں کی رہائی چاہتے ہیں،روس کیخلاف جنگ میں امریکا یوکرین کا تحفظ کرے۔
میونخ سکیورٹی کانفرنس میں شرکت کے دوران گفتگو کرتے ہوئے یوکرینی صدر ولادی میر زیلنسکی کا کہنا تھا کہ ٹرمپ کا روسی صدر سے ٹیلیفونک رابطہ نیک شگون نہیں ہے۔
انہوں نے کہا کہ ہم انسانی بنیادوں پر قیدیوں کی رہائی چاہتے ہیں، پیوٹن امریکا کے ساتھ دو طرفہ مذاکرات کرنا چاہتے ہیں، معاملات کو پیوٹن کے حسبِ منصوبہ آگے بڑھنے نہیں دینا چاہیے، ہم ایسے کسی بھی معاہدے کو قبول نہیں کر سکتے جس میں ہمیں شامل نہ کیا گیا ہو۔
یوکرینی صدر کا کہنا تھا کہ وہ جلد مسلم ممالک کا دورہ کریں گے، دورے میں ترکیہ،سعودی عرب اور متحدہ عرب امارات شامل ہیں تاہم انہوں نے یہ نہیں بتایا کہ وہ سہ ملکی دورہ کب کریں گے۔
