ویب ڈیسک: خیبر پختونخوا میں سکیورٹی فورسز کی دو الگ الگ کارروائیوں میں 15دہشتگرد ہلاک جبکہ شدید فائرنگ کے تبادلے میں پاک فوج کے لیفٹیننٹ سمیت 4جوان شہید ہو گئے ۔
پاک فوج کے شعبہ تعلقات عامہ کی جانب سے جاری بیان کے مطابق خیبر پختونخوا ضلع ڈیرہ اسماعیل خان کے علاقے ہتھالہ میں انٹیلی جنس کی بنیاد پر آپریشن کیا گیا جہاں دہشتگردوں کی موجودگی کی اطلاع ملی تھی۔
دورانِ آپریشن، سکیورٹی فورسز نے دہشت گردوں کے ٹھکانے کو موثر انداز میں نشانہ بنایا، جس کے نتیجے میں9دہشتگرد ، بشمول ان کے سرغنے ہلاک ہو گئے۔
ترجمان پاک فوج کے مطابق مارے جانے والوں میں خارجی رِنگ لیڈر فارمان عرف ثاقب، خارجی امان اللہ عرف توری، خارجی سعید عرف لیاقت خارجی بلال شامل ہیں۔
آئی ایس پی آر کے مطابق تمام دہشت گرد علاقے میں متعدد تخریبی سرگرمیوں میں ملوث اور قانون نافذ کرنے والے اداروں کو مطلوب تھے۔
ایک اور کارروائی میں شمالی وزیرستان کے علاقے میران شاہ میں سکیورٹی فورسز نے 6دہشت گردوں کو ہلاک کردیا ۔
آئی ایس پی آر کے مطابق دہشت گردوں کے خلاف اس کارروائی میں شدید فائرنگ کے تبادلے کے دوران لیفٹیننٹ محمد حسان ارشف نے بہادری سے دشمن کا مقابلہ کرتے ہوئے جامِ شہادت نوش کیا، ان کے ساتھ تین جوانوں نے بھی مادرِ وطن پر اپنی جان نچھاور کر دی۔
