ویب ڈیسک: سابق وزیراعظم اور مسلم لیگ ن کے صدرمیاں نواز شریف نے کہا ہے کہ کرپشن، معاشی تباہی، مہنگائی اور بدتمیزی تبدیلی سرکار کی سوغاتیں تھیں۔
وزیراعلیٰ پنجاب مریم نواز کے ہمراہ اراکین اسمبلی سے گفتگو کرتے ہوئے میاں نواز شریف کا کہناتھا کہ سیاست میں گند ڈال کر اسے تباہ کیا گیا، ہمارا بیانیہ ملک کی ترقی اور عوام کو مہنگائی سے نجات دلانا ہے، جو وعدے کیے تھے وہ آج عوام کو پورے ہوتے نظر آرہے ہیں۔
میاں نوازشریف نے کہا کہ بد تہذیبی، بدتمیزی، بغض اور انتقام کو سیاست بنادیا گیا، معیشت و اقدار تباہ کیں اور جمہوریت کی پیٹھ میں خنجر گھونپا گیا۔
انہوں نے کہا کہ پاکستان ڈیفالٹ کے منہ سے واپس آیا ہے، وزیراعظم شہبازشریف کی محنت سے معاشی استحکام واپس آیا ہے اور پالیسیوں کے تسلسل سے معاشی ترقی یقینی ہوگیآئی ایم ایف نے پاکستان کی ترقی کا اعتراف کیا، شہباز شریف کی محنت رنگ لارہی ہے۔
سابق وزیر اعظم کا کہنا تھا کہ کرپشن، معاشی تباہی، مہنگائی اور بدتمیزی تبدیلی سرکار کی سوغاتیں تھیں، ہم نے آئی ایم ایف کو خدا حافظ کہہ دیا تھا، ہمارا بیانیہ ملک کی ترقی اور عوام کو مہنگائی سے نجات دلاکر خوش حال بنانا ہے، جو وعدے کئے تھے اللہ تعالی کے فضل وکرم سے وہ آج عوام کو پورے ہوتے نظر آرہے ہیں۔
اس موقع پر ارکان اسمبلی نے کہا کہ نوازشریف اور شہبازشریف وعدوں کی تکمیل، وطن سے وفا کے نام ہیں ، نوازشریف اور شہبازشریف نے ذاتی تکالیف بھلا کر ہمیشہ پاکستان اور عوام کی تکلیفیں دور کی ہیں۔
اانہوں نے کہا کہ وزیراعظم شہباز شریف نے پاکستان کے معاشی استحکام کے لیے شہباز سپیڈ سے کام کیا ہے، وزیراعظم شہباز شریف کی ذاتی کوششوں سے آئی ایم ایف پروگرام بحال ہوا اور ملک ڈیفالٹ سے بچ گیا۔
ارکان اسمبلی نے کہا کہ مریم نواز نے نوازشریف اور شہبازشریف کے دور کی یاد تازہ کردی ہے، ہمیں اپنی وزیر اعلیٰ پر فخر ہے ،پہلی خاتون وزیراعلیٰ کے طورپر مریم نوازشریف کی عوامی خدمت کا ہر طرف اعتراف ہو رہا ہے۔
اس موقع پر وزیراعلیٰ مریم نواز نے کہا کہ عوام کی خدمت کا مشن چیلنج سمجھ کر سنبھالا ، قیادت اور جماعت کا شکریہ کہ مجھے یہ ذمہ داری دی۔
