ویب ڈیسک: وزیراعلیٰ پنجاب مریم نواز نے کہا ہے کہ وقت نے ایسا پلٹا کھایا کہ عمران خان خود ہی اپنے دام میں آگئے ۔
لاہو رمیں آسان کاروبار پروگرام کی تقریب سے خطاب میں وزیراعلیٰ پنجاب مریم نواز کا کہنا تھاکہ باتیں کرنا، الزام لگانا، پگڑی اچھالنا بہت آسان ہوتا ہے، وہ اپنے مکافات عمل کے دام میں خود ہی آگئے، وقت نے کیسا پلٹا کھایا ، آج وہ اڈیالا میں میرے پاس بند ہے۔
انہوں نے کہا کہ سکیم بعد میں لانچ ہوتی ہے، ہم گرانڈ پر پہلے لاتے ہیں، کچھ لوگوں کو تین کروڑ، کچھ کو 50 لاکھ قرضہ ملا ہے، ایک مہینے کے اندر ہم پہلے قرضے دینے جارہے ہیں، دس لاکھ سے 3 کروڑ روپے قرض کی اسکیم ہے، قرض پر کوئی سود نہیں لے رہے ہیں۔
مریم نواز نے کہا کہ قرض کیلئے کوئی سفارش نہیں، میرٹ پر قرضے مل رہے ہیں، 100 فیصد میرٹ پر یہ قرضے دیے جارہے ہیں، قرضے عوام کو مل رہے ہیں اور خوشی مجھے ہو رہی ہے، ہم نوجوانوں کو کاروبار کے لیے بلا سود قرض فراہم کر رہے ہیں۔
وزیراعلیٰ پنجاب کا کہنا تھاکہ ایک لاکھ 85 ہزار درخواستیں 10 لاکھ قرض کے لیے آئی ہیں، 71 ہزار درخواستیں تین کروڑ روپے قرض کے لیے آئی ہیں، جنھیں قرض دیا جارہا ہے، ان کی تعداد روز معلوم کروں گی، جتنا کاروبار بڑھے گا لوگوں کو ملازمتیں ملیں گی، اپوزیشن کچھ بھی کہتی رہے، پاکستان ٹیک آف پوزیشن میں آچکا ہے۔
انہوں نے کہا کہ لوگ جلائو گھیرائو اور انتشار سے تنگ آچکے ہیں، لوگ دیکھ رہے ہیں کہ ان کی زندگی میں بہتری آرہی ہے، 38 فیصد پر مہنگائی لے جانے کے لیے نالائقی کے انبار لگے، یہ حکومت میں تھے تو ملک سے سرمایہ کاری چلی گئی، پنجاب میں 700 سڑکیں بنا رہے ہیں، کبھی کوئی کہتا تھا کہ سڑکیں بنانے سے قوم ترقی نہیں کرتی، سڑکیں بنانے سے ترقی نہیں کرتی تو کیا جلا ئوگھیرا ئوسے کرتی ہے۔
ان کا کہنا تھاکہ اس ماہ کے آخر تک 20 ہزار لوگوں کو گھر بنانے کے لیے قرض مل جائے گا، رمضان المبارک میں جن کیپاس پلاٹ نہیں انہیں پلاٹ دینے کی اسکیم لارہے ہیں، رمضان المبارک میں 35 ہزار افراد کو 10 ہزار روپے ملیں گے، ہمارے ساتھی وزیراعلی نے کہا کہ ہم آپ کی اسکیم کاپی کررہے ہیں، میں نے کہا اسکیم کاپی نہ کریں جو بھی تفصیلات ہوں گی میں فراہم کروں گی۔
وزیراعلیٰ پنجاب نے عمران خان کا نام لیے بغیر تنقید کی اور کہا کہ باتیں کرنا، الزام لگانا، پگڑی اچھالنا بہت آسان ہوتا ہے، وہ اپنے مکافات عمل کے دام میں خود ہی آگئے، وقت نے کیسا پلٹا کھایا ، آج وہ اڈیالا میں میرے پاس بند ہے، میں نے کبھی ان کا اے سی بند کرنے، کھانوں پر اعتراض نہیں کیا، ملک جلا گھیرا اور بدتمیزی کا متحمل نہیں ہوسکتا، اگر اب ملک نے ترقی نہ کی تو بہت سے نوجوان امید چھوڑ دیں گے۔
