ویب ڈیسک: سرحد چیمبر آف کامرس اینڈ انڈسٹریز کے وفد سے ملاقات میں وزیراعلیٰ خیبرپختونخوا نے کہا کہ صنعتوں کو سستی بجلی کی فراہمی کیلئَے ٹرانسمشن لائن بچھا رہے ہیں، جس سے انہیں آسانی رہے گی۔
تفصیلات کے مطابق وزیر اعلیٰ خیبر پختونخوا علی امین گنڈاپور سے سرحد چیمبر آف کامرس اینڈ انڈسٹریز کے وفد نے ملاقات کی، اس موقع پر صوبائی کابینہ اراکین مینا خان آفریدی ، عبد الکریم تورڈھیر، محمد اسرار کے علاؤہ محکمہ صنعت کے حکام بھی شریک ہوئے۔ وفد نے وزیر اعلیٰ کو صوبے کے صنعتکاروں اور تاجروں کو درپیش مسائل سے آگاہ کیا۔
اس موقع پر وزیر اعلیٰ نے صوبے کے صنعتکاروں اور اور تاجر برادری کو درپیش مسائل ترجیحی بنیادوں پر حل کرنے کی یقین دہانی کراتے ہوئے مقامی صنعتکاروں کو مائننگ کے شعبے میں بھی سرمایہ کاری کی دعوت دی۔ انہوں نے بتایا کہ مائننگ کے شعبے کو جدید خطوط پر ترقی دینے کے لیے صوبائی حکومت نے اپنی مائننگ کمپنی بنا لی ہے۔
انہوں نے کہا کہ صوبائی حکومت سرمایہ کاری کو راغب کرنے کے لیے متعدد منصوبوں پر کام کر رہی ہے، سرمایہ کاروں کو ون ونڈو کے ذریعے تمام تر سہولیات آن لائن فراہم کرنے اور کاروبار کو آسان بنانے کے لیے نیا قانون لا رہے ہیں، صنعتوں کو سستی بجلی کی فراہمی کیلئے صوبائی ٹرانسمشن لائن بچھا رہے ہیں، جس سے صوبائی حکومت کی بجلی پیداوار مقامی صنعتوں کو سستے نرخوں پر فراہم کی جائے گی۔
وزیر اعلیٰ خیبرپختونخوا نے کہا کہ اگلے چند سالوں میں زیر تعمیر بجلی گھروں سے تقریباً 800 میگا واٹ بجلی پیدا ہوگی، ان کا کہنا تھا کہ صنعت و تجارت کو ترقی دے کر ہی بے روزگاری ہر قابو پایا جا سکتا ہے، خیبر پختونخوا میں سرمایہ کاری کے لیے ماحول مکمل ساز گار، سرمایہ کار بلاجھجک سرمایہ کاری کریں، جبکہ صوبے میں مختلف شعبہ جات میں سرمایہ کاری کے وسیع مواقع موجود ہیں۔
وزیر اعلیٰ خیبر پختونخوا نے کہا کہ صوبائی حکومت سرمایہ کاروں کو ہر ممکن تعاون فراہم کرے گی، جبکہ تجارتی شعبے کو فروغ دینے کے لیے نئی لیز پالیسی بھی لائی جا رہی ہے۔ اس کے ساتھ ساتھ پشاور میں بی آر ٹی کے کمرشل پلازے بھی رواں سال جون تک مکمل ہو جائیں گے، صنعتکاروں کو صوبائی ٹیکسوں کی مد میں بھی ریلیف دیا جائے گا تاکہ صوبے کی صنعتیں پھیلیں پھولیں۔
علی امین گنڈاپور نے کہا کہ صنعتکاروں و تاجروں کے وفاق سے جڑے مسائل وفاقی حکومت کے ساتھ اٹھائے جائیں گے، دوسری طرف پشاور میں بڑھتے ٹریفک مسائل کے حوالے سے انہوں نے واضح کیا کہ ٹریفک کا مسئلہ مستقل بنیادوں پر حل کرنے کے لیے 7 نئے انڈر پاسز جلد تعمیر کیے جائیں گے، اس موقع پر وفد نے صنعتکاروں و تاجروں کے مسائل حل کرنے لیے ہدایات جاری کرنے پر وزیر اعلیٰ کا شکریہ ادا کیا، اور کہا کہ صنعتکار صوبے کی تعمیر و ترقی میں حکومت کا بھرپور ساتھ دیں گے۔
