ویب ڈیسک: خیبرپختونخوا حکومت اور منتخب بلدیاتی نمائندوں نے وفاق سے صوبے کے حقوق کے حصول کے لئے ایکا کر لیا ۔
تفصیلات کے مطابق وزیراعلیٰ خیبر پختونخوا علی امین خان گنڈاپور سے تحصیل مئیر مردان حمایت اللہ مایار کی قیادت میں لوکل گورنمنٹ ایسوسی ایشن کے وفد نے ملاقات کی جس میں وفاق سے جڑے صوبے کے مالی مسائل سے متعلق معاملات پر گفتگو کی گئی ۔
اس موقع پر منتخب بلدیاتی نمائندوں نے صوبے کے آئینی حقوق کے حصول کی جدو جہد میں صوبائی حکومت کا بھر پور ساتھ دینے کا اعلان کرتے ہوئے واضح کیا کہ اس سلسلے میں25فروری کو صوبہ بھر کی تحصیل کونسلز کا اجلاس منعقد کرکے قرارداد منظور کی جائے گی۔
ملاقات میں فیصلہ کیا گیا کہ قرارداد میں وفاقی حکومت سے صوبے کے آئینی شیئرز کی جلد ادائیگی کا مطالبہ کیا جائے گا جبکہ وفاق کی طرف سے شیئر نہ ملنے کی صورت میں صوبہ بھر کے منتخب بلدیاتی نمائندے وزیر اعلی کی سربراہی میں بھر پور احتجاج کریں گے۔
ملاقات میں اتفاق کیا گیا کہ ضرورت پڑنے پر سپریم کورٹ سے رجوع کیا جائے گا اور صوبے کا مقدمہ عدالتی فورم پر لڑیں گے۔
وفدنے واضح کیا کہ صوبے کے جائز اور آئینی حقوق کے حصول کی جدوجہد میں وزیر اٰعلی کا بھرپور ساتھ دیں گے،یہ صوبے کے عوام کے حقوق کا معاملہ ہے، اس پر کوئی سیاست اور سمجھوتہ نہیں کریں گے، اس مقصد کے لئے سیاسی وابستگیوں سے بالاتر ہوکر صوبائی حکومت کا بھر پور ساتھ دیں گے۔
اس موقع پر وفد سے بات چیت کرتے ہوئے وزیراعلیٰ خیبر پختونخوا علی امین گنڈا پور نے کہا کہ سابقہ قبائلی علاقوں کو صوبے میں ضم ہوئے چھ سال ہوئے لیکن این ایف سی میں ان علاقوں کا شئیر نہیں مل رہااس مد میں صوبائی حکومت کو سالانہ ڈھائی سو ارب روپے سالانہ ملنے ہیں۔
انہوں نے کہا کہ پن بجلی کے خالص منافع کی مد میں وفاق کے ذمے صوبے کے 22 سو ارب روپے واجب الادا ہیں جبکہ ٹوبیکو سیس کی مد میں صوبائی حکومت کو سالانہ 225 ارب روپے ملنے ہیں۔
ملاقات کے دوران بلدیاتی حکومتوں کو درپیش مسائل پر بھی بات چیت کی گئی جس پر وزیراعلیٰ علی امین گنڈا پور نے بلدیاتی نمائندوں کو درپیش مسائل ترجیحی بنیادوں پر حل کرنے کی یقین دہانی کرائی ۔
انہوں نے کہا کہ بانی چیئرمین پی ٹی آئی کے وژن کے مطابق بلدیاتی حکومتوں کو با اختیار بنائیں گے، اس مقصد کے لئے متعلقہ قوانین میں ضروری ترامیم کی جائیں گی۔
علی امین گنڈا پور نے کہا کہ بلدیاتی نمائندے براہ راست عوام کے ووٹ سے منتخب ہوئے ہیں انہیں با اختیار بنایا جائے گا، بلدیاتی نمائندے وفاق سے صوبے کے حقوق لینے میں اپنا کردار ادا کریں۔
